ബെംഗളൂരു: കര്ണാടകയില് അമൃത് ഭാരത് പദ്ധതിയിൽ നവീകരിച്ച 4 സ്റ്റേഷനുകളുടെ ഉദ്ഘാടനം ഇന്നു പ്രധാനമന്ത്രി നരേന്ദ്ര മോദി ഓൺലൈനായി നിർവഹിക്കും. ബാഗൽകോട്ട് ജില്ലയിലെ ബദാമി, കൊപ്പാൾ, ദക്ഷിണ കന്നഡ ജില്ലയിലെ ബന്ത്വാൾ, ധാർവാഡ് ജില്ലയിലെ അൽനാവാർ എന്നീ സ്റ്റേഷനുകളാണ് അത്യാധുനിക സൗകര്യങ്ങളോടെ വികസിപ്പിച്ചത്. രാജ്യത്താകെ 75 റെയിൽവേ സ്റ്റേഷനുകളാണ് ഇന്ന് ഉദ്ഘാടനം ചെയ്യുന്നത്.
കൊപ്പാൾ 21.14 കോടി രൂപയും ബന്ത്വാൾ 26.18 കോടി രൂപയും ബാദാമി 15.10 കോടി രൂപയും അൽനാവർ 17.2 കോടിയും ചെലവിട്ടാണ് നവീകരിച്ചത്. സ്റ്റേഷനിലെ കെട്ടിടങ്ങൾ നവീകരിക്കുകയും യാത്രക്കാർക്ക് കൂടുതൽ സൗകര്യങ്ങൾ ഒരുക്കുകയും ചെയ്തിട്ടുണ്ട്. ഭിന്നശേഷിക്കാർക്കായി റാംപുകൾ, ബുക്കിങ് കൗണ്ടറുകളിൽ പ്രത്യേക സൗകര്യങ്ങൾ തുടങ്ങിയവ ഏർപ്പെടുത്തിയിട്ടുണ്ട്. പദ്ധതിയിൽ ഉൾപ്പെടുത്തി നവീകരണം പൂർത്തിയാക്കിയ അഞ്ചുസ്റ്റേഷനുകൾ കഴിഞ്ഞ വർഷം മേയിൽ ഉദ്ഘാടനം ചെയ്തിരുന്നു. ഗദഗ്, ധാർവാഡ്, ഗോകക് റോഡ്, മുനിരാബാദ്, ബാഗൽകോട്ട് എന്നിവയാണ് അന്ന് നവീകരണം പൂർത്തിയാക്കിയത്.
SUMMARY: Inauguration of 4 stations renovated under Amrit Bharat project today
