ബെംഗളൂരു: കർണാടക ട്രാൻസ്പോർട്ട് കോർപ്പറേഷൻ ജീവനക്കാർ ഇന്ന് മുതൽ നടത്താൻ നിശ്ചയിച്ചിരുന്ന അനിശ്ചിത കാലസമരം ഹൈക്കോടതി തടഞ്ഞു. വിദ്യാർഥികൾ ഉൾപ്പെടെ ഒട്ടേറെ യാത്രക്കാർക്കു ബുദ്ധിമുട്ടാകുമെന്നു ചൂണ്ടിക്കാട്ടിയുള്ള ഹർജിയിലാണ് അവധിക്കാല ബെഞ്ച് സമരം തടഞ്ഞത്. ഇതോടെ ബുധനാഴ്ച സംസ്ഥാനത്ത് സർക്കാർ ബസ് സർവീസുകൾ സാധാരണ പോലെ തന്നെ തുടരും. ചർച്ചനടത്താൻ സർക്കാരിനോടും ട്രാൻസ്പോർട്ട് കോർപ്പറേഷനുകളോടും തൊഴിലാളി യൂണിയനുകളോടും ഹൈക്കോടതി ആവശ്യപ്പെട്ടു.
25 ശതമാനം വേതന വർധന അടക്കമുള്ള ആവശ്യങ്ങൾ ഉന്നയിച്ചാണ് തൊഴിലാളി യൂണിയനുകളുടെ സംയുക്ത കർമസമിതി സമരത്തിന് ആഹ്വാനം ചെയ്തത്. സമരം ജനങ്ങളുടെ ദൈനം ദിനജീവിതത്തെ ബാധിക്കുമെന്ന് ചൂണ്ടിക്കാട്ടി സ്ഥിരം ബസ് യാത്രക്കാരും ദിവസവേതന ജീവനക്കാരുമായ ശ്രീധാര, വേദവതി എന്നിവർ സമർപ്പിച്ച പൊതുതാത്പര്യ ഹർജി പരി ഗണിച്ചാണ് ജസ്റ്റിസ് സൂരജ് ഗോവിന്ദരാജ്, ജസ്റ്റിസ് മന്മദറാവു എന്നിവരടങ്ങിയ ബെഞ്ച് സമരം താത്കാലികമായി തടഞ്ഞത്.
25 ശതമാനം വേതനവർധന, ശമ്പളകുടിശ്ശിക പൂർണമായും നൽകുക, 31 ശതമാനം ക്ഷാമബത്ത അടിസ്ഥാന ശമ്പളത്തിൽ ലയിപ്പിക്കുക തുടങ്ങിയവയാണ് ജീവനക്കാരുടെ ആവശ്യങ്ങൾ. പ്രതിദിന ബാറ്റയിലും മറ്റ് അലവൻസുകളിലും വർധന വേണമെന്നും യൂണിയൻ ആവശ്യപ്പെടുന്നുണ്ട്.
ജീവനക്കാർക്ക് 12.5 ശതമാനം വേതനവർധന ഇതിനകംതന്നെ നടപ്പാക്കിയെന്നും 450 കോടി രൂപ ഈയിനത്തിൽ നൽകിയിട്ടുണ്ടെന്നും ചൊവ്വാഴ്ച ഹർജി പരിഗണിച്ചപ്പോൾ കർണാടക ആർടിസി കോടതിയെ അറിയിച്ചു. ചീഫ് സെക്രട്ടറി, ഗതാഗതവകുപ്പ് പ്രിൻസിപ്പൽ സെക്രട്ടറി, യൂണിയനുകളുടെ സംയുക്ത കർമസമിതി, ട്രാൻസ്പോർട്ട് കോർപ്പറേഷനുകൾ എന്നിവർക്ക് നോട്ടീസ് നൽകിയ കോടതി വ്യാഴാഴ്ച ഹർജി വീണ്ടും പരിഗണിക്കും.
SUMMARY: Karnataka RTC employees called off strike after High Court ban
