ന്യൂഡൽഹി: ദേശീയ പരീക്ഷാ ഏജൻസി യു.ജി. 2026 പുനഃപരീക്ഷാഫലം പ്രഖ്യാപിച്ചു. പരീക്ഷ എഴുതിയ വിദ്യാർഥികൾക്ക് ഔദ്യോഗിക വെബ്സൈറ്റിലൂടെ മാർക്ക് പട്ടിക പരിശോധിക്കാം. മെഡിക്കൽ ബിരുദ പ്രവേശനത്തിനായുള്ള കൗൺസലിങ് നടപടികൾ ഉടൻ ആരംഭിക്കുമെന്നാണ് പ്രതീക്ഷ.
പഞ്ചാബിലെ ആര്യൻ ഗുപ്തയും ഹരിയാനയിലെ പൻഷുൽ ബൻസാൽയും 720ൽ 715 മാർക്ക് നേടി രാജ്യത്ത് ഒന്നാം റാങ്ക് പങ്കിട്ടു. ഇത്തവണ 700 മാർക്കിന് മുകളിൽ 19 വിദ്യാർഥികൾ മാർക്ക് നേടിയതായി ഫലവിവരങ്ങളിൽ വ്യക്തമാക്കുന്നു. പരീക്ഷയിൽ ആദ്യ നൂറു റാങ്ക് ജേതാക്കളില് കേരളത്തില് നിന്നും ഒരാള് മാത്രമാണ് ഇടംപിടിച്ചത്. നീരജ് ബി എന്ന വിദ്യാർത്ഥിക്കാണ് കേരളത്തില് ഒന്നാം റാങ്ക്. ദേശീയ തലത്തില് 89ാം റാങ്കാണ് നീരജിന് ലഭിച്ചിരിക്കുന്നത്.
ദേശീയ പരീക്ഷാ ഏജൻസി പുറത്തുവിട്ട കണക്കുകൾ പ്രകാരം 11.21 ലക്ഷത്തിലധികം വിദ്യാർഥികൾ പരീക്ഷയിൽ യോഗ്യത നേടി. 690 മാർക്കിന് മുകളിൽ 138 പേർ മാർക്ക് നേടിയിട്ടുണ്ട്. യോഗ്യത നേടിയവരിൽ 58 ശതമാനത്തിലധികം പേർ പെൺകുട്ടികളാണ്, ഇത് ഇത്തവണത്തെ ശ്രദ്ധേയമായ പ്രത്യേകതയായി വിലയിരുത്തപ്പെടുന്നു.
ഫലം പ്രഖ്യാപിച്ചതോടെ വിദ്യാർഥികൾക്ക് മെഡിക്കൽ, ദന്തൽ, ആയുഷ് കോഴ്സുകളിലേക്കുള്ള പ്രവേശനത്തിനായുള്ള കേന്ദ്ര-സംസ്ഥാനതല കൗൺസലിങ് നടപടികളിൽ പങ്കെടുക്കാം. ഔദ്യോഗിക വെബ്സൈറ്റിൽ നിന്ന് മാർക്ക് പട്ടിക ഡൗൺലോഡ് ചെയ്ത് തുടർ പ്രവേശന നടപടികൾക്കായി തയാറെടുക്കണമെന്ന് ദേശീയ പരീക്ഷാ ഏജൻസി നിർദേശിച്ചു.
റിസള്ട്ട് പരിശോധിക്കാം :
https://examinationservices.nic.in/ResultoService26/Ntnt/Login
https://cnr.nic.in/ResultDir/Ntnt/Login
SUMMARY: NEET UG 2026 results declared; 11.21 lakh candidates qualified, two students shared first rank
