ഹർഭജൻ സിംഗിന്റെ സുരക്ഷ പഞ്ചാബ് സർക്കാർ പിൻവലിച്ചു; സിആർപിഎഫ് സുരക്ഷയൊരുക്കി കേന്ദ്രം

ഡല്‍ഹി: ആംആദ്മി പാർട്ടി വിട്ട് ബിജെപിയിലെത്തിയ മുൻ ക്രിക്കറ്റ് താരവും രാജ്യസഭാംഗവുമായ ഹർഭജൻ സിംഗിന് കേന്ദ്രസുരക്ഷ ഏർപ്പെടുത്തി. പഞ്ചാബ് സർക്കാർ നല്‍കിവന്നിരുന്ന സുരക്ഷ പിൻവലിച്ചതിന് പിന്നാലെയാണ് കേന്ദ്ര റിസർവ് പോലീസ് സേനയുടെ സുരക്ഷ നല്‍കിയത്. കഴിഞ്ഞ ദിവസം ഹർഭജൻ സിംഗിന്റെ വസതിക്ക് മുന്നില്‍ എഎപി പ്രവർത്തകർ പ്രതിഷധപ്രകടനം നടത്തിയിരുന്നു. ഇതിന്റെ പശ്ചാത്തലത്തിലാണ് അടിയന്തര നടപടി.

ഹർഭജൻ സിംഗിന്റെ സുരക്ഷയ്ക്കായി ഡല്‍ഹിയിലും പ‍ഞ്ചാബിലും സിആർപിഎഫ് കമാൻഡോകളെ വിന്യസിക്കും. കഴിഞ്ഞ കുറച്ച് ദിവസങ്ങളായി ഹർഭജൻ സിങ്ങും മറ്റ് ആറ് എഎപി എംപിമാരും പാർട്ടി വിട്ട് ബിജെപിയിൽ ചേരുമെന്ന റിപ്പോർട്ടുകൾ പുറത്തുവന്നിരുന്നു. രാഘവ് ഛദ്ദയുടെ നേതൃത്വത്തിലുള്ള സംഘം ബിജെപിയിലേക്ക് നീങ്ങുന്നതായാണ് സൂചന. രാഘവ് ഛദ്ദ ബിജെപി പാളയത്തിലെത്തുകയും ചെയ്തു. എന്നാല്‍ ഹർഭജൻ സിങ് ഔദ്യോഗികമായി ബിജെപി പ്രവേശം പ്രഖ്യാപിച്ചിട്ടില്ലെങ്കിലും, സുരക്ഷാ പിൻവലിക്കലും നിലവിലെ രാഷ്ട്രീയ സാഹചര്യങ്ങളും അദ്ദേഹം ഉടൻ തന്നെ കാവി പാളയത്തിലെത്തുമെന്ന സൂചനയാണ് നൽകുന്നത്.

ഹർഭജൻ സിങ് പാർട്ടിയെ വഞ്ചിച്ചുവെന്ന് ആരോപിച്ച് പഞ്ചാബിലെ വിവിധയിടങ്ങളിൽ എഎപി പ്രവർത്തകർ പ്രതിഷേധം നടത്തിയിരുന്നു. ജലന്ധറിലെ അദ്ദേഹത്തിന്റെ വീടിന് മുന്നിൽ തടിച്ചുകൂടിയ പ്രവർത്തകർ മതിലുകളിൽ ‘ഗദ്ദാർ’ (വഞ്ചകൻ) എന്ന് എഴുതിവെക്കുകയും മുദ്രാവാക്യം വിളിക്കുകയും ചെയ്തു. ഹർഭജനെ കൂടാതെ മറ്റ് ചില എംപിമാരുടെ വീടുകൾക്ക് മുന്നിലും സമാനമായ രീതിയിൽ പ്രതിഷേധങ്ങൾ അരങ്ങേറിയിട്ടുണ്ട്. 

SUMMARY: Punjab government withdraws Harbhajan Singh’s security; Centre provides CRPF security