ശബരിമല തീര്‍ത്ഥാടനം; ബെംഗളൂരുവില്‍ നിന്ന് പമ്പയിലേക്ക് എസി വോള്‍വോ സ്‌പെഷ്യല്‍ ബസ് സര്‍വീസ് എര്‍പ്പെടുത്തി കര്‍ണാടക ആര്‍ടിസി

ബെംഗളൂരു: മണ്ഡലകാലത്ത് ബെംഗളൂരുവില്‍ നിന്ന് പമ്പയിലേക്ക് (നിലയ്ക്കല്‍) നേരിട്ടുള്ള സ്‌പെഷ്യല്‍ ബസ് സര്‍വീസ് ആരംഭിച്ച് കര്‍ണാടക ആര്‍ടിസി. ഐരാവത് എസി വോള്‍വോ ബസാണ് സര്‍വീസ് നടത്തുക. ഈ മാസം 28 മുതല്‍ സര്‍വീസ് ആരംഭിക്കുന്ന ബസ് മകരവിളക്ക് കഴിയുന്നത് വരെ സര്‍വീസ് നടത്തും.

ബെംഗളൂരുവിലെ ശാന്തിനഗര്‍ ബസ് സ്റ്റേഷനില്‍ നിന്ന് എല്ലാ ദിവസവും ഉച്ചയ്ക്ക് 1.50 ന് പുറപ്പെടുന്ന ബസ് സാറ്റലൈറ്റ് (2.30) മൈസൂരു (5.35), ബത്തേരി, കോഴിക്കോട്, തൃശൂർ, എരുമേലി വഴി പിറ്റേ ദിവസം രാവിലെ 6.45ന് നിലയ്ക്കലിലെത്തും. തിരിച്ച് വൈകിട്ട് 6ന് നിലയ്ക്കലിൽ നിന്ന് പുറപ്പെട്ട് രാവിലെ 10നു ബെംഗളൂരുവിലെത്തും. 1950 രൂപയാണ് ടിക്കറ്റ് നിരക്ക്. മൈസൂരുവിൽ നിന്നും റിസർവേഷൻ സൗകര്യമുണ്ടാകും.

തിരക്കേറുന്നതോടെ വാരാന്ത്യങ്ങളിൽ ഒരു സർവീസ് കൂടി ആരം ഭിക്കുമെന്ന് കര്‍ണാടക ആര്‍ടിസി അധികൃതര്‍ അറിയിച്ചു. മലയാളികള്‍ ഉള്‍പ്പെടെ മണ്ഡലകാലത്ത് ആയിരക്കണക്കിന് തീര്‍ത്ഥാടകരാണ് ബെംഗളൂരില്‍ നിന്ന് ശബരിമലയില്‍ എത്തുന്നത്. ഇവര്‍ക്ക് ഏറ്റവും പ്രയോജനപ്പെടുന്നതായിരിക്കും ഈ പുതിയ സര്‍വീസ്.
SUMMARY: Sabarimala pilgrimage; Karnataka RTC to operate AC Volvo special bus service from Bengaluru to Pampa