ഗതാഗത കുരുക്കഴിയുന്നു; സിൽക്ക്ബോർഡ് ഡബിൾഡക്കർ മേൽപ്പാലത്തിലെ റാഗിഗുഡ്‌ഡയിലേക്കുള്ള റാംപ് തുറന്നു

ബെംഗളൂരു: സിൽക്ക്ബോർഡ് ഡബിൾ ഡക്കർ മേൽപ്പാലത്തിലെ റാഗിഗുഡ്ഡയിലേക്കുള്ള റാംപ് ബുധനാഴ്ച മുതല്‍ വാഹനഗതാഗതത്തിനായി തുറന്നു കൊടുത്തു. എച്ച്.എസ്.ആർ.ലേ ഔട്ടിനെ ജയനഗർ റാഗിഗുഡ്ഡയുമായി ബന്ധിപ്പിക്കുന്ന മേൽപ്പാലം പൂർണമായും തുറന്നുകൊടുക്കുന്നതായി സൗത്ത് ഈസ്റ്റ് ട്രാഫിക് പോലീസ് അറിയിച്ചു. 5 റാംപുകളുള്ള പാലത്തിന്റെ രണ്ടാമത്തെ റാംപാണു തുറന്നു കൊടുത്തത്. എച്ച്എസ്ആർ ഫിഫ്ത്ത് മെയിൻ മുതൽ റാഗിഗുഡ്ഡ മെട്രോ സ്റ്റേഷൻ വരെ നീളുന്ന റാംപ് തുറന്നതോടെ സിൽക്ക് ബോർഡ് ജംക്‌ഷനിലെ ഗതാഗതക്കുരുക്കിൽപെടാതെ സഞ്ചരിക്കാനാകും. 2024 ജൂലായില്‍ റാഗിഗുഡ്ഡയിൽ നിന്നു സിൽക്ക്ബോർഡ് ഭാഗത്തേക്കുള്ള റാംപ് ഗതാഗതത്തിനു തുറന്നു നൽകിയിരുന്നു.

റാഗിഗുദ്ദയെ സെൻട്രൽ സിൽക്ക് ബോർഡുമായി ബന്ധിപ്പിക്കുന്ന 5.12 കിലോമീറ്റർ ദൈർഘ്യമുള്ള മേൽപാലത്തിന് 5 റാംപുകളാണ് നിർമിക്കുന്നത്. ഇതിൽ 3 റാംപു കളുടെ നിർമാണം പുരോഗമിക്കുകയാണ്. ബിടിഎം ലേഔട്ട്-സിൽക്ക്ബോർഡ്, ഔട്ടർ റിങ് റോഡ്-സിൽക്ക്ബോർഡ്, എച്ച്എസ്ആർ ലേഔട്ട്-ബിടി എം ലേഔട്ട് എന്നീ റാംപുകളുടെ നിർമാണം ഡിസംബറിനുള്ളിൽ പൂർത്തീകരിക്കാനാണു ലക്ഷ്യമിടുന്നത്.

449 കോടി രൂപ ചെലവിൽ ബെംഗളൂരു മെട്രോ റെയിൽ കോർപ്പറേഷൻ ലിമിറ്റഡാണ് മേൽപ്പാലം നിർമിക്കുന്നത്. മേൽപ്പാലത്തിന്റെ മുകളിലുടെ ആർവി റോഡ്-ബൊ മ്മസന്ദ്ര മെട്രോയും താഴത്തെ പാലത്തിലൂടെ വാഹനങ്ങളും കടന്നുപോകും. നഗരത്തില്‍ ഏറ്റവും ഗതാഗതക്കുരുക്കനുഭവപ്പെടുന്ന ജങ്ഷനുകളിലൊന്നായ സെൻട്രൽ സിൽക്ക് ബോർഡ് ജങ്ഷനിലെ തിരക്ക് മേല്‍പ്പാലം പൂര്‍ണ്ണ ഗതാഗത സജ്ജമാകുന്നതോടെ ഒഴിവാകുമെന്നാണ് പ്രതീക്ഷിക്കുന്നത്.

SUMMARY: Traffic congestion eases; Ramp to Ragigudda on Silkboard Double Decker Flyover opens