പെൺസുഹൃത്തുക്കളുടെ ഫോട്ടോ എടുത്തത് ചോദ്യം ചെയ്തു; വിദ്യാർഥിയെ മർദിച്ച് കൊലപ്പെടുത്തി

ബെംഗളൂരു: പെൺസുഹൃത്തുക്കളുടെ ഫോട്ടോ എടുത്തത് ചോദ്യം ചെയ്തതിനു വിദ്യാർഥിയെ മർദിച്ച് കൊലപ്പെടുത്തി. രാമനഗര ചിക്കെനഹള്ളിയിലാണ് സംഭവം. ബെംഗളൂരുവിൽ നിന്നുള്ള പുനീത് (21) ആണ് കൊല്ലപ്പെട്ടത്. പുനീതും സഹപാഠികളായ ആറു പേരും അവധി ആഘോഷിക്കാനാണ് രാമനഗരയിൽ എത്തിയിരുന്നത്.

ചിക്കെനഹള്ളി തടാകത്തിൽ നീന്താൻ ഇറങ്ങിയ പുനീതിന്റെയും പെൺസുഹൃത്തുക്കളുടെയും ചിത്രങ്ങൾ ചിലർ അനുവാദം ചോദിക്കാതെ എടുത്തിരുന്നു. ഇത് ചോദ്യം ചെയ്ത പുനീതിനെ മൂന്ന് പേർ ക്രൂരമായി മർദിക്കുകയായിരുന്നു.

വടിയും മൂർച്ചയേറിയ ആയുധങ്ങളും ഉപയോഗിച്ചാണ് യുവാക്കൾ പുനീത്തിനെ ആക്രമിച്ചത്. തലയ്ക്ക് ഗുരുതരമായി പരുക്കേറ്റ പുനീതിനെ കെംഗേരിയിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും മസ്തിഷ്ക മരണം സംഭവിക്കുകയായിരുന്നു. സംഭവത്തിൽ കേസെടുത്ത പോലീസ് പ്രതികളായ ചന്ദ്രു, നാഗേഷ്, മുരളി എന്നിവരെ അറസ്റ്റ് ചെയ്തു. മരണപ്പെട്ട പുനീതിന്റെ അവയവങ്ങൾ ദാനം ചെയ്തതായി ബന്ധുക്കൾ അറിയിച്ചു.

TAGS: BENGALURU | ATTACK
SUMMARY: Student beaten to death for questioning locals taking photos of female friends