ന്യൂഡല്ഹി: പഹൽഗാം ഭീകരാക്രമണത്തിൻ്റെ പശ്ചാത്തലത്തിൽ പ്രധാനമന്ത്രി നരേന്ദ്ര മോദി ദ്വിദിന സൗദി അറേബ്യ സന്ദർശനം വെട്ടിച്ചുരുക്കി ഇന്ത്യയിലേക്ക് തിരിച്ചു. ജിദ്ദയിൽ നിന്നുള്ള എയർ ഇന്ത്യ – ബോയിംഗ് വിമാനം അൽപസമയത്തിനകം ഡൽഹിയിൽ എത്തും. പിന്നാലെ, മോദിയുടെ അധ്യക്ഷതയിൽ ഉന്നതതല സുരക്ഷാ യോഗം ചേരും. ഔദ്യോഗിക വിരുന്ന് ഒഴിവാക്കി, സൗദി കിരീടാവകാശി മുഹമ്മദ് ബിൻ സൽമാനുമായി കൂടിക്കാഴ്ച നടത്തിയാണ് മോദി മടങ്ങിയെത്തുന്നത്. കൂടിക്കാഴ്ചയിൽ പഹൽഗാം ഭീകരാക്രമണം ചർച്ചയായെന്ന് ഇന്ത്യൻ വിദേശകാര്യമന്ത്രാലയം. സൗദി സഹായം വാഗ്ദാനം ചെയ്തെന്നും ഭീകരതയെ ഒന്നായി നേരിടാൻ ഇരുരാജ്യങ്ങളും തീരുമാനിച്ചുവെന്നും ഇന്ത്യൻ വിദേശകാര്യമന്ത്രാലയം വ്യക്തമാക്കി.
യുഎസ്, പെറു സന്ദർശനത്തിലായിയിരുന്ന ധനമന്ത്രി നിർമല സീതാരാമനും വിദേശയാത്ര വെട്ടിച്ചുരുക്കി രാജ്യത്തേക്ക് മടങ്ങുകയാണെന്ന് അറിയിച്ചു. ഭീകരാക്രമണ സാഹചര്യം വിലയിരുത്താൻ പ്രധാനമന്ത്രിയുടെ അധ്യക്ഷതയിൽ ഇന്ന് യോഗം ചേരുന്നുണ്ട്.
പഹൽഗാമിലെ ബൈസരനിൽ വിനോദസഞ്ചാരികൾക്കു നേരെയുണ്ടായ ഭീകരാക്രമണത്തിൽ 26 പേരാണ് കൊല്ലപ്പെട്ടത്. കൊല്ലപ്പെട്ടവരിൽ ഒരു മലയാളിയും ഉൾപ്പെടുന്നുണ്ട്. ഇടപ്പള്ളി സ്വദേശി എൻ രാമചന്ദ്രനാണ് മരിച്ചത്. രാജസ്ഥാൻ, തമിഴ്നാട്, കർണാടക, ഗുജറാത്ത്, മഹാരാഷ്ട്ര എന്നിവിടങ്ങളിൽ നിന്നെത്തിയ വിനോദസഞ്ചാരികളാണ് ആക്രമണത്തിനിരയായത്. വിനോദസഞ്ചാരികൾ പതിവായി എത്തുന്ന ബൈസരൻ താഴ്വരയിലാണ് ആക്രമണം. നിരവധി മലയാളികൾ പഹൽഗാമിൽ ഉണ്ടെന്നാണ് റിപ്പോർട്ടുകൾ.
അതേസമയം ഭീകരാക്രമണത്തിൽ പ്രതിഷേധിച്ച് നിരവധി സംഘടനകൾ ജമ്മു കശ്മീരിൽ ഇന്ന് ബന്ദ് പ്രഖ്യാപിച്ചിട്ടുണ്ട്. വ്യാപാരികൾ ഉൾപ്പെടെയുള്ള സംഘടനകളാണ് ബന്ദിന് ആഹ്വാനം ചെയ്തത്. ജമ്മു കശ്മീർ ചേമ്പർ ഓഫ് കൊമേഴ്സ് ആൻഡ് ഇൻഡസ്ട്രി (ജെസിസിഐ) വിശ്വ ഹിന്ദ് പരിഷത്ത് (വിഎച്ച്പി), ട്രാൻസ്പോർട്ടേഴ്സ് അസോസിയേഷൻ, ജമ്മു ബാർ അസോസിയേഷൻ, കോൺഗ്രസ് പാർട്ടി എന്നിവരെല്ലാം ജമ്മു കശ്മീരിൽ ഇന്ന് (ബുധനാഴ്ച ) ബന്ദിന് ആഹ്വാനം ചെയ്തിട്ടുണ്ട്. ഭരണകക്ഷിയായ ജമ്മു ആൻഡ് കശ്മീർ നാഷണൽ കോൺഫറൻസ്(ജെകെഎൻസി) ബന്ദിന് പിന്തുണ പ്രഖ്യാപിച്ചു.
<br>
TAGS : PAHALGAM TERROR ATTACK,
SUMMARY : Pahalgam terror attack: Bandh in Kashmir today, Prime Minister cut off foreign travel
