കുടുംബവഴക്ക്; രണ്ട് മക്കളെ കൊലപ്പെടുത്തി യുവതി ജീവനൊടുക്കി

ബെംഗളൂരു: കുടുംബവഴക്ക് കാരണം രണ്ട് മക്കളെ കൊലപ്പെടുത്തിയ ശേഷം യുവതി ജീവനൊടുക്കി. കൊടിഗെഹള്ളിയിലാണ് സംഭവം. വീട്ടമ്മയായ കുസുമ (35), ആറുവയസ്സുള്ള മകൻ ശ്രേയൻ, ഒരു വയസ്സുള്ള ഒമ്പത് മാസം പ്രായമുള്ള മകൾ ചാർവി എന്നിവരാണ് മരിച്ചത്.

കുസുമയുടെ ഭർത്താവും അക്കൗണ്ടൻ്റായ സുരേഷ്, സംഭവം നടക്കുമ്പോൾ ജോലിസ്ഥലത്തായിരുന്നു. തിരികെ വീട്ടിലെത്തിയപ്പോഴാണ് മൃതദേഹങ്ങൾ കണ്ടത്. തുടർന്ന് പോലീസിൽ വിവരമറിയിക്കുകയായിരുന്നു. 2015ൽ വിവാഹിതരായ ഇരുവരും കുടുംബത്തോടൊപ്പം കൊടിഗെഹള്ളിയിലാണ് താമസിച്ചിരുന്നത്. ദമ്പതികൾ തമ്മിൽ വഴക്ക് പതിവായിരുന്നു. കഴിഞ്ഞ ചൊവ്വാഴ്ച രാത്രിയും ഇരുവരും തമ്മിൽ വഴക്കുണ്ടായതായി അയൽക്കാർ പറഞ്ഞു.

ഇതേതുടർന്നാണ് മക്കളെ കഴുത്തുഞെരിച്ച് കൊലപ്പെടുത്തിയ ശേഷം സ്വയം ജീവനൊടുക്കുകയായിരുന്നു. പോലീസ് ഇവരുടെ പക്കൽ നിന്നും ആത്മഹത്യ കുറിപ്പും കണ്ടെടുത്തു. തങ്ങളുടെ മരണത്തിന് ആരും ഉത്തരവാദികൾ അല്ലെന്നും, ജീവിതം അവസാനിപ്പിക്കുകയാണെന്നും കത്തിലുള്ളതായി പോലീസ് പറഞ്ഞു. സംഭവത്തിൽ പോലീസ് കേസെടുത്തു.

TAGS: BENGALURU | DEATH
SUMMARY: Bengaluru woman kills her 2 children and dies by suicide