ബന്ദിപ്പുർ വഴിയുള്ള രാത്രിയാത്രക്ക് ഇളവ് ഉടനില്ല; സിദ്ധരാമയ്യ

ബെംഗളൂരു: ബന്ദിപ്പുർ വഴിയുള്ള രാത്രി യാത്രയിൽ നിലവിൽ ഇളവ് നൽകില്ലെന്ന് വ്യക്തമാക്കി മുഖ്യമന്ത്രി സിദ്ധരാമയ്യ. ഇതുമായി ബന്ധപ്പെട്ട് കഴിഞ്ഞ ദിവസങ്ങളിൽ ഉയർന്നുവന്ന അഭ്യൂഹങ്ങൾ പാടേ തള്ളിക്കൊണ്ടാണ് മുഖ്യമന്ത്രിയുടെ പ്രതികരണം. മൈസൂരുവിൽ മാധ്യമ പ്രവർത്തകരോട് സംസാരിക്കവേയാണ് സിദ്ധരാമയ്യ ഇക്കാര്യത്തിൽ തന്റെ നിലപാട് വ്യക്തമാക്കിയത്. ഇതോടെ മലയാളികൾ ഏറെക്കാലമായി പ്രതീക്ഷിക്കുന്ന ബന്ദിപ്പുർ രാത്രി യാത്രാ നിരോധനത്തിലെ ഇളവിന് ഇനിയും കാത്തിരിക്കേണ്ടി വരും.

നിലവിൽ രാത്രി യാത്രാ നിരോധനം നീക്കാനോ അതിൽ ഇളവ് നൽകാനോ ഉള്ള യാതൊരു നിർദ്ദേശങ്ങളും സർക്കാരിന് മുന്നിൽ ഇല്ലെന്നും സിദ്ധരാമയ്യ വ്യക്തമാക്കി. സർക്കാർ തലത്തിൽ ഇതുമായി ബന്ധപ്പെട്ട ചർച്ചകൾ നടന്നിട്ടില്ലെന്നും അദ്ദേഹം അറിയിച്ചു. വയനാട് ഉപതിരഞ്ഞെടുപ്പ് പ്രചാരണ വേളയിൽ കർണാടക ഉപമുഖ്യമന്ത്രി ഡികെ ശിവകുമാർ ബന്ദിപ്പൂർ വിഷയത്തിൽ അനുകൂല നിലപാടിനുള്ള സാധ്യത പങ്കുവച്ചിരുന്നു. ഇതിന് പിന്നാലെയാണ് ഇവിടെ ഇളവ് വരുമെന്ന തരത്തിലുള്ള വാർത്തകൾ ഉയർന്നത്. ബന്ദിപ്പുർ സ്ട്രെച്ചിലെ എൻഎച്ച് 766, എൻഎച്ച് 67 ദേശീയ പാതകളിലെ രാത്രി യാത്രാ നിരോധനം നിലവിലെ സ്ഥിതിയിൽ തന്നെ തുടരും.

TAGS: KARNATAKA | BANDIPUR TRAVEL BAN
SUMMARY: Not opening Bandipur pass for night travel, says Chief Minister Siddaramaiah