തിരുവനന്തപുരം: 2026ലെ വയലാർ രാമവർമ്മ മെമ്മോറിയല്‍ സാഹിത്യ അവാർഡ് ആർ. രാജശ്രീയ്ക്ക്. ആത്രേയകം എന്ന കൃതിക്കാണ് പുരസ്കാരം. തിരുവനന്തപുരം മസ്കറ്റ് ഹോട്ടലില്‍ ചേർന്ന ജഡ്ജിംഗ് കമ്മിറ്റിയുടെ ശുപാർശ വയലാർ രാമവർമ്മ മെമ്മോറിയല്‍ ട്രസ്റ്റ് അംഗീകരിച്ചു. ഒ. വി. ഉഷ, സുഭാഷ് ചന്ദ്രൻ, വി. വി. വിജയകുമാർ എന്നിവരാണ് ജഡ്ജിംഗ് കമ്മിറ്റി അംഗങ്ങള്‍. ഒരു ലക്ഷം രൂപയും പ്രശസ്ത ശില്പി കാനായി കുഞ്ഞിരാമൻ വെങ്കലത്തില്‍ നിർമ്മിച്ച ശില്പവും പ്രശസ്തിപത്രവുമാണ് അവാർഡ്.
അവാർഡ് തുക നികുതിയില്‍ നിന്നും ഒഴിവാക്കിയിട്ടുണ്ട്. വയലാറിന്റെ 50-ാം സ്മൃതിയും അൻപതാം വയലാർ അവാർഡ് സമർപ്പണവും സമന്വയിപ്പിച്ച്‌ ഒരു വർഷക്കാലമായി നടത്തിവരുന്ന “വയലാർ വർഷം 2025-26” പരിപാടികളുടെ സമാപനവും 50-ാമത് വയലാർ സാഹിത്യ അവാർഡ് സമർപ്പണവും വയലാർ രാമവർമ്മയുടെ ചരമദിനമായ ഒക്ടോബർ 27ന് വൈകുന്നേരം 5:30ന് തിരുവനന്തപുരം നിശാഗന്ധി ഓഡിറ്റോറിയത്തില്‍ വച്ച്‌ നടത്തും.
സംസ്ഥാന മുഖ്യമന്ത്രി വി. ഡി. സതീശൻ അവാർഡ് സമർപ്പിക്കും. വയലാർ വർഷം ആഘോഷത്തിന്റെ ഭാഗമായി സംഘടിപ്പിച്ച വിവിധ മത്സരങ്ങളിലെ വിജയികള്‍ക്ക് സാംസ്കാരിക മന്ത്രി പി. സി. വിഷ്ണുനാഥ് സമ്മാനങ്ങള്‍ നല്‍കും. അവാർഡ് നല്‍കുന്ന പ്രസക്ത വർഷത്തിന് മുൻപുള്ള അഞ്ച് വർഷങ്ങള്‍ക്കുള്ളില്‍ പ്രഥമ പ്രസിദ്ധീകരണം നടത്തിയ മലയാള സാഹിത്യ ശാഖയിലെ മൗലിക കൃതികളില്‍ നിന്നാണ് അവാർഡിന് അർഹമായ കൃതി തെരഞ്ഞെടുത്തത്.
SUMMARY: 50th Vayalar Award for R. Rajasree
