ബെംഗളൂരു: സംസ്ഥാനത്ത് ഭക്ഷ്യസുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പാക്കാൻ പരിശോധന ശക്തമാക്കി കർണാടക ആരോഗ്യവകുപ്പ്. ഇതിന്റെ ഭാഗമായി സംസ്ഥാനത്തെ 1,849 ഭക്ഷ്യ സ്ഥാപനങ്ങളിൽ പരിശോധന നടത്തിയതായി അധികൃതർ അറിയിച്ചു.
പരിശോധനയുടെ ഭാഗമായി ഹോട്ടലുകൾ, റെസ്റ്റോറന്റുകൾ, ഭക്ഷ്യവിൽപ്പനശാലകൾ, മറ്റ് ഭക്ഷ്യ സ്ഥാപനങ്ങൾ എന്നിവിടങ്ങളിൽ നിന്ന് 2,400-ലേറെ ഭക്ഷ്യസാമ്പിളുകൾ ശേഖരിച്ച് പരിശോധനയ്ക്ക് അയച്ചു. ഭക്ഷണത്തിന്റെ ഗുണനിലവാരം, ശുചിത്വം, ഉപയോഗിക്കുന്ന അസംസ്കൃത വസ്തുക്കളുടെ നിലവാരം തുടങ്ങിയവയാണ് പ്രധാനമായും പരിശോധിക്കുന്നത്.
ഭക്ഷ്യസുരക്ഷാ മാനദണ്ഡങ്ങൾ ലംഘിക്കുന്ന സ്ഥാപനങ്ങൾക്കെതിരെ നിയമനടപടി സ്വീകരിക്കുമെന്ന് ആരോഗ്യവകുപ്പ് വ്യക്തമാക്കി. നിലവാരമില്ലാത്തതോ സുരക്ഷിതമല്ലാത്തതോ ആയ ഭക്ഷണം വിൽക്കുന്ന സ്ഥാപനങ്ങൾക്കെതിരെ പിഴ ഉൾപ്പെടെയുള്ള നടപടികൾ സ്വീകരിക്കും.
ഹോട്ടലുകളിലും റെസ്റ്റോറന്റുകളിലും ഭക്ഷണം തയ്യാറാക്കുന്ന സ്ഥലത്തെ ശുചിത്വം, ജീവനക്കാരുടെ ആരോഗ്യസ്ഥിതി, ഭക്ഷണം സൂക്ഷിക്കുന്ന രീതി, കുടിവെള്ളത്തിന്റെ ഗുണനിലവാരം എന്നിവയും പരിശോധനയുടെ ഭാഗമാണ്.
ഭക്ഷ്യസുരക്ഷയുമായി ബന്ധപ്പെട്ട് ഉപഭോക്താക്കളുടെ പരാതികൾ വേഗത്തിൽ അധികൃതരുടെ ശ്രദ്ധയിൽപ്പെടുത്തുന്നതിനായി ഹോട്ടലുകളിലും ഭക്ഷണശാലകളിലും ക്യുആർ കോഡ് സംവിധാനം ഏർപ്പെടുത്താനുള്ള പദ്ധതിയും സർക്കാർ മുന്നോട്ടുവച്ചിട്ടുണ്ട്.
ഭക്ഷ്യസുരക്ഷാ പരിശോധനകൾ തുടരുമെന്നും നിയമലംഘനം കണ്ടെത്തുന്ന സ്ഥാപനങ്ങൾക്കെതിരെ കർശന നടപടി സ്വീകരിക്കുമെന്നും ആരോഗ്യവകുപ്പ് അറിയിച്ചു.
SUMMARY: Food safety inspection is strong in Karnataka; Inspection of 1,849 establishments
