ബെംഗളൂരു: ബാലവേലക്കെതിരായ പ്രത്യേക പരിശോധനയിൽ ബെംഗളൂരുവിലെ യശ്വന്ത്പുര എപിഎംസി യാർഡിൽ നിന്ന് 29 പ്രായപൂർത്തിയാകാത്ത കുട്ടികളെ രക്ഷപ്പെടുത്തി. മുഖ്യമന്ത്രി ഡി കെ ശിവകുമാറിന്റെ നിർദ്ദേശപ്രകാരം തൊഴിൽ വകുപ്പ്, പോലീസ്, ബാലസംരക്ഷണ വിഭാഗം എന്നിവയുടെ നേതൃത്വത്തിൽ നടത്തിയ പരിശോധനയിലാണ് കുട്ടികളെ കണ്ടെത്തിയത്. ബീഹാർ, പശ്ചിമ ബംഗാൾ, ഉത്തർപ്രദേശ്, രാജസ്ഥാൻ എന്നിവിടങ്ങളിൽ നിന്നുള്ള കുട്ടികളെയാണ് രക്ഷപ്പെടുത്തിയത്.
യശ്വന്ത്പുര കാർഷിക ഉൽപ്പന്ന വിപണിയിലെ വിവിധ കടകളിലും വ്യാപാര സ്ഥാപനങ്ങളിലും കുട്ടികളെ ജോലിക്കായി നിയോഗിച്ചിരുന്നതായാണ് കണ്ടെത്തൽ. രക്ഷപ്പെടുത്തിയവരിൽ 19 കുട്ടികൾ യശ്വന്ത്പുര എപിഎംസി യാർഡിൽ ജോലി ചെയ്തിരുന്നവരാണ്. മറ്റ് കുട്ടികളെ നഗരത്തിലെ വിവിധ ഭാഗങ്ങളിൽ നിന്നാണ് കണ്ടെത്തിയത്.
ചൊവ്വാഴ്ച രാവിലെ ആർഎംസി യാർഡ് പോലീസ് സ്റ്റേഷൻ പരിധിയിലുള്ള എപിഎംസി മാർക്കറ്റ് സന്ദർശിച്ച മുഖ്യമന്ത്രി കർഷകർ, തൊഴിലാളികൾ, വ്യാപാരികൾ എന്നിവരുമായി സംവദിച്ച് അവരുടെ പരാതികൾ കേട്ടു. സന്ദർശന വേളയിൽ, ചില കടകളിൽ കുട്ടികളെ ജോലിക്കെടുക്കുന്നുണ്ടെന്ന് പൊതുജനങ്ങൾ അദ്ദേഹത്തെ അറിയിച്ചിരുന്നു. ഇതേ തുടർന്നാണ് നടപടി.
കുട്ടികളെ ചുമടെടുക്കൽ, സാധനങ്ങൾ അടുക്കിവയ്ക്കൽ, പാക്കിങ്, മറ്റ് സഹായ ജോലികൾ എന്നിവയ്ക്കായി ഉപയോഗിച്ചിരുന്നോയെന്നും അന്വേഷണ സംഘം പരിശോധിക്കുന്നുണ്ട്. കുട്ടികളുടെ പ്രായം സംബന്ധിച്ച രേഖകൾ പരിശോധിച്ച ശേഷമാണ് നിയമപരമായ തുടർനടപടികൾ സ്വീകരിക്കുക.
പരിശോധനയുടെ ഭാഗമായി നാല് കേസുകൾ രജിസ്റ്റർ ചെയ്തതായി അധികൃതർ അറിയിച്ചു. ബാലവേല നിരോധന നിയമം ഉൾപ്പെടെയുള്ള വ്യവസ്ഥകൾ പ്രകാരമാണ് കേസുകൾ എടുത്തത്. കുട്ടികളെ ജോലിക്ക് നിയോഗിച്ച വ്യാപാര സ്ഥാപനങ്ങളുടെയും തൊഴിലുടമകളുടെയും ഉത്തരവാദിത്വം സംബന്ധിച്ചും അന്വേഷണം നടക്കുകയാണ്.
രക്ഷപ്പെടുത്തിയ കുട്ടികളെ അധികൃതർ സുരക്ഷിത കേന്ദ്രങ്ങളിലേക്ക് മാറ്റി. അവരുടെ കുടുംബ പശ്ചാത്തലം പരിശോധിച്ച് ആവശ്യമായ സംരക്ഷണവും പുനരധിവാസ സഹായവും നൽകുന്നതിനുള്ള നടപടികൾ ആരംഭിച്ചിട്ടുണ്ട്.
ബെംഗളൂരുവിലെ വിപണികൾ, ഹോട്ടലുകൾ, നിർമാണ മേഖല, ചെറുകിട വ്യാപാര സ്ഥാപനങ്ങൾ തുടങ്ങിയ ഇടങ്ങളിൽ ബാലവേല കണ്ടെത്തുന്നതിനുള്ള പരിശോധനകൾ കൂടുതൽ ശക്തമാക്കുമെന്ന് അധികൃതർ വ്യക്തമാക്കി. കുട്ടികളെ നിയമവിരുദ്ധമായി ജോലിക്ക് നിയോഗിക്കുന്ന സ്ഥാപനങ്ങൾക്കെതിരെ കർശന നടപടി സ്വീകരിക്കുമെന്നും മുന്നറിയിപ്പ് നൽകി.
SUMMARY: Child labor; 29 children rescued from Yeshwantpura APMC yard
