ബെംഗളൂരു: നഗരത്തിലെ റോഡുകളിലും നടപ്പാതകളിലും ഒഴിഞ്ഞ സ്ഥലങ്ങളിലും കെട്ടിക്കിടന്ന നിർമാണ-പൊളിക്കൽ പ്രത്യേക ശുചീകരണ യജ്ഞത്തിൽ 1,40,277 ടൺ മാലിന്യം നീക്കം ചെയ്തതായി ഗ്രേറ്റർ ബെംഗളൂരു അതോറിറ്റി അറിയിച്ചു. ഓഗസ്റ്റ് മാസത്തിൽ നടപ്പാക്കിയ ‘മാലിന്യമുക്ത ബെംഗളൂരു’ പദ്ധതിയുടെ ഭാഗമായാണ് നടപടി.
നിർമാണ പ്രവർത്തനങ്ങളിൽ നിന്നുള്ള അവശിഷ്ടങ്ങൾ, മണ്ണ്, പൊളിച്ച കെട്ടിടങ്ങളുടെ അവശിഷ്ടങ്ങൾ, റോഡരികിൽ അനധികൃതമായി തള്ളിയ മാലിന്യം തുടങ്ങിയവയാണ് പ്രധാനമായും നീക്കം ചെയ്തത്. നഗരത്തിലെ അഞ്ച് നഗര കോർപ്പറേഷൻ പരിധികളിലായി 3,378 സ്ഥലങ്ങളിൽ നിന്ന് 82,124 ടൺ നിർമ്മാണ-പൊളിക്കൽ മാലിന്യം ഗ്രേറ്റർ ബെംഗളൂരു അതോറിറ്റി മാത്രം നീക്കം ചെയ്തു.
ഒരു മാസത്തെ ശുചീകരണ പ്രവർത്തനത്തിനിടെ അധികൃതർക്ക് 6,819 പരാതികളും അഭ്യർഥനകളും ലഭിച്ചു. ഓഗസ്റ്റിൽ പ്രതിദിനം ശരാശരി 2,650 ടൺ മാലിന്യമാണ് നീക്കം ചെയ്തത്. ബെംഗളൂരു വടക്കൻ നഗര കോർപ്പറേഷൻ 29,830 ടൺ, പടിഞ്ഞാറൻ നഗര കോർപ്പറേഷൻ 20,848 ടൺ, തെക്കൻ നഗര കോർപ്പറേഷൻ 13,775 ടൺ, കിഴക്കൻ നഗര കോർപ്പറേഷൻ 11,606 ടൺ, മധ്യ നഗര കോർപ്പറേഷൻ 6,065 ടൺ എന്നിങ്ങനെയാണ് നീക്കം ചെയ്ത മാലിന്യത്തിൻ്റെ കണക്ക് .
മറ്റ് സർക്കാർ ഏജൻസികളും ശുചീകരണത്തിൽ പങ്കെടുത്തു.
ബെസ്കോം 3,448 കേടായ ട്രാൻസ്ഫോർമറുകളും വൈദ്യുതി തൂണുകളും ഉൾപ്പെടെയുള്ള മാലിന്യങ്ങളും നീക്കം ചെയ്തതോടൊപ്പം 7,547 യാർഡുകളും വൃത്തിയാക്കി.നഗരത്തിലെ പൊതുസ്ഥലങ്ങളിൽ നിന്ന് മാലിന്യം നീക്കി വീണ്ടെടുത്ത ഇടങ്ങൾ വീണ്ടും അനധികൃതമായി മാലിന്യം തള്ളുന്ന സ്ഥലങ്ങളാകാതിരിക്കാൻ സംരക്ഷിക്കുമെന്നും ബെംഗളൂരു വികസന മന്ത്രി കൃഷ്ണ ബൈരേഗൗഡ പറഞ്ഞു. നിർമ്മാണ മാലിന്യം തള്ളുന്നത് തടയാൻ മാലിന്യം കൊണ്ടുപോകുന്ന വാഹനങ്ങളുടെ രജിസ്ട്രേഷനും ജിപിഎസ് നിരീക്ഷണവും നിർബന്ധമാക്കുന്ന നടപടികളും സർക്കാർ പ്രഖ്യാപിച്ചിട്ടുണ്ട്.
SUMMARY: Construction waste removal operation in Bengaluru; 1.40 lakh tonnes of waste removed
