കീവ്: കിഴക്കൻ യുക്രെയ്നിൽ റഷ്യ നടത്തിയ ആക്രമണത്തിൽ രണ്ട് ബസുകൾക്ക് തീപിടിച്ച് 33 പേർ ദാരുണമായി കൊല്ലപ്പെട്ടു. ഈ വർഷം യുക്രെയ്നിൽ റഷ്യ ഒറ്റ ദിവസം നടത്തുന്ന ഏറ്റവും മാരകമായ ആക്രമണമാണിത്.
ഡൊനെറ്റ്സ്ക് മേഖലയിലെ ക്രാമറ്റോർസ്ക് (Kramatorsk) നഗരത്തിലാണ് ഈ നടുക്കുന്ന സംഭവം ഉണ്ടായത്. ആക്രമണത്തിൽ 18 പേർക്ക് ഗുരുതരമായി പരിക്കേറ്റിട്ടുണ്ട്. സ്ഫോടനത്തെയും തീപിടിത്തത്തെയും തുടർന്ന് പ്രദേശത്തെ പൊതുഗതാഗത സംവിധാനം പൂർണമായി നിർത്തിവച്ചു.
സാധാരണക്കാരെ മനഃപൂർവം ലക്ഷ്യമിട്ടാണ് റഷ്യ ഈ ആക്രമണം നടത്തിയതെന്ന് ഡൊനെറ്റ്സ്ക് റീജിയണൽ മിലിട്ടറി അഡ്മിനിസ്ട്രേഷൻ തലവൻ വാഡിം ഫിലാഷ്കിൻ വ്യക്തമാക്കി. ഒറ്റയടിക്ക് പരമാവധി ആളുകളെ കൊല്ലുന്നതിനാണ് യാത്രക്കാരുള്ള ബസുകൾ അവർ തെരഞ്ഞെടുത്തതെന്നും അദ്ദേഹം കുറ്റപ്പെടുത്തി.
ആക്രമണത്തെ തുടർന്ന് കനത്ത സുരക്ഷാ ആശങ്ക നിലനിൽക്കുന്നതിനാൽ, ജീവൻ നിലനിർത്തുന്നതിനായി രാജ്യത്തിന്‍റെ മറ്റ് സുരക്ഷിതമായ ഭാഗങ്ങളിലേക്ക് മാറിത്താമസിക്കാൻ അധികൃതർ ജനങ്ങൾക്ക് കർശന നിർദ്ദേശം നൽകിയിട്ടുണ്ട്.
SUMMARY: Russian attack in eastern Ukraine; 33 killed as buses catch fire.
