ബെംഗളൂരു: ഹിന്ദുസ്ഥാൻ എയറോനോട്ടിക്സ് ലിമിറ്റഡിന്റെ വിവിധ എൻജിനീയറിങ് വിഭാഗങ്ങളിലായി ജൂനിയർ എക്സിക്യൂട്ടീവ് തസ്തികകളിലേക്ക് അപേക്ഷ ക്ഷണിച്ചു. ആകെ 150 ഒഴിവുണ്ട്. മെക്കാനിക്കൽ, ഇലക്ട്രിക്കൽ, ഇലക്ട്രോണിക്സ്, കമ്പ്യൂട്ടർ സയൻസ് എന്നിവയുൾപ്പെടെ ഒമ്പത് ശാഖകളിലാണ് തസ്തികകൾ. കരാറടിസ്ഥാനത്തിൽ പരമാവധി മൂന്ന് വർഷത്തേക്കാണ് നിയമനം. www.halindia.co.inഎന്ന വെബ്സൈറ്റ് വഴിയാണ് അപേക്ഷിക്കേണ്ടത്. അവസാന തീയതി ഒക്ടോബർ 17.
തിരഞ്ഞെടുക്കപ്പെടുന്നവർക്ക് തുടക്കത്തിൽ പ്രതിമാസം 30,000 രൂപ അടിസ്ഥാന ശമ്പളവും ഡിയർനസ് അലവൻസ് (DA), ഹൗസ് റെന്റ് അലവൻസ് (HRA), 35 ശതമാനം കഫറ്റീരിയ അലവൻസ് എന്നിവയും ലഭിക്കും.
ബെംഗളൂരു, തുമകൂർ (കർണാടക), ഹൈദരാബാദ് (തെലങ്കാന), നാസിക് (മഹാരാഷ്ട്ര), കോരാപുട്ട് (ഒഡിഷ), ബാരക്പൂർ (പശ്ചിമ ബംഗാൾ), ലഖ്നൗ, കാൺപൂർ, കോർവ (ഉത്തർപ്രദേശ്) എന്നീ ഇടങ്ങളിലുള്ള എച്ച്എഎൽ ഡിവിഷനുകളിലോ ഓഫീസുകളിലോ ആയിരിക്കും നിയമനം.
യോഗ്യരായ എല്ലാ ഇന്ത്യൻ പൗരന്മാർക്കും അപേക്ഷിക്കാം. ബന്ധപ്പെട്ട വിഷയങ്ങളിൽ അംഗീകൃത സർവകലാശാലയിൽനിന്ന് നേടിയ റഗുലർ/ഫുൾ ടൈം എൻജിനീയറിങ്/ടെക്നോളജി ബിരുദം (BE/ BTech). ജനറൽ/ഒബിസി/ഇഡബ്ല്യുഎസ് വിഭാഗക്കാർക്ക് കുറഞ്ഞത് 60% മാർക്കും എസ്‌സി/എസ്ടി/ഭിന്നശേഷി വിഭാഗക്കാർക്ക് കുറഞ്ഞത് 50% മാർക്കും ഉണ്ടായിരിക്കണം.
പ്രായപരിധി: 28. നിയമാനുസൃത ഇളവ് ലഭിക്കും. യോഗ്യതാ പരീക്ഷയിലെ മാർക്കിന്റെ അടിസ്ഥാനത്തിൽ ഷോർട്ട്ലിസ്റ്റ് ചെയ്യുന്ന ഉദ്യോഗാർഥികളെ അഭിമുഖം നടത്തിയാണ് തിരഞ്ഞെടുക്കുക.
ജനറൽ, ഒബിസി, ഇഡബ്ല്യുഎസ് വിഭാഗക്കാർക്ക് 500 രൂപയാണ് അപേക്ഷാഫീസ്. എസ്‌സി, എസ്ടി, ഭിന്നശേഷി വിഭാഗക്കാർക്ക് ഫീസ് ഇല്ല.
SUMMARY: HAL Junior Executive Recruitment; Applications invited for 150 posts.
