ബെംഗളൂരു: ബെംഗളൂരു റൂറൽ ജില്ലയുടെ പേര് ബെംഗളൂരു നോർത്ത് എന്നു മാറ്റാൻ സംസ്ഥാന സർക്കാർ പദ്ധതിയിടുന്നതായി റിപ്പോർട്ട്. ഇന്ന് നന്ദിഹിൽസിൽ ചേരുന്ന മന്ത്രിസഭായോഗം ഇക്കാര്യം പരിഗണിച്ചേക്കും.1986ലാണ് തലസ്ഥാനമായിരുന്ന ബെംഗളൂരു വിഭജിച്ച് ബെംഗളൂരു റൂറൽ, ബെംഗളൂരു അർബൻ ജില്ലകൾ രൂപീകരിച്ചത്. ഹൊസ്കോട്ടെ, ദേവനഹള്ളി, ദൊഡ്ഡബെല്ലാപുര, നെലമംഗല എന്നിങ്ങനെ 4 നിയമസഭാ മണ്ഡലങ്ങളാണ് ബെംഗളൂരു റൂറൽ ജില്ലയിൽ ഉൾപ്പെടുന്നത്.
നേരത്തേ രാമനഗര ജില്ലയുടെ പേര് ബെംഗളൂരു സൗത്ത് എന്നു മാറ്റിയിരുന്നു. ചിക്കബല്ലാപുരയിലെ ബാഗേപ്പള്ളിയുടെ പേര് ഭാഗ്യാനഗർ എന്നു മാറ്റുന്നതും സർക്കാർ പരിഗണിക്കുന്നുണ്ട്. ആന്ധ്രാപ്രദേശ് അതിർത്തിയോടു ചേർന്നു കിടക്കുന്ന പ്രദേശമാണ് ബാഗേപള്ളി. തെലുങ്ക് നാമമാണ് ബാഗേപള്ളിയെന്നു ചൂണ്ടിക്കാട്ടി പേരുമാറ്റണമെന്ന ആവശ്യവുമായി ഒരു വിഭാഗം സർക്കാരിനെ സമീപിക്കുകയായിരുന്നു.
SUMMARY: Govt planning to rename Bengaluru rural as Bengaluru North.
