ബെംഗളൂരു: നഗരത്തിലെ പോലീസ് ഭരണസംവിധാനം പുനഃസംഘടിപ്പിച്ച് അഞ്ച് പ്രത്യേക പോലീസ് കമ്മീഷണറേറ്റുകളായി വിഭജിക്കാൻ കർണാടക സർക്കാർ ഉത്തരവിട്ടു. നഗരത്തിന്റെ ക്രമസമാധാനപാലനവും പോലീസ് പ്രവർത്തനങ്ങളുടെ കാര്യക്ഷമതയും മെച്ചപ്പെടുത്തുക എന്ന ലക്ഷ്യത്തോടെയാണ് നടപടി. പുതിയ സംവിധാനത്തിന്റെ ഭാഗമായി മുതിർന്ന ഐ.പി.എസ്. ഉദ്യോഗസ്ഥൻ ആർ. ഹിതേന്ദ്രയെ ബെംഗളൂരുവിന്റെ ആദ്യ ചീഫ് പോലീസ് കമ്മീഷണറായി നിയമിച്ചു.
പുതിയ ക്രമീകരണപ്രകാരം ബെംഗളൂരു സെൻട്രൽ, ഈസ്റ്റ്, വെസ്റ്റ്, നോർത്ത്, സൗത്ത് എന്നിങ്ങനെ അഞ്ച് കമ്മീഷണറേറ്റുകളുണ്ടാകും. ഓരോ മേഖലയുടെയും ചുമതല പ്രത്യേകം കമ്മീഷണർമാർക്കായിരിക്കും. നഗരത്തിലെ ജനസംഖ്യയും വ്യാപ്തിയും വർധിച്ചതോടെ പോലീസ് സംവിധാനത്തെ കൂടുതൽ വികേന്ദ്രീകരിക്കേണ്ടതുണ്ടെന്ന വിലയിരുത്തലിന്റെ അടിസ്ഥാനത്തിലാണ് പുനഃസംഘടന.
പുതിയ നിയമനപ്രകാരം ലാബു റാമിന് സെൻട്രൽ ബെംഗളൂരുവിന്റെയും പി.എസ്. ഹർഷയ്ക്ക് ഈസ്റ്റ് ബെംഗളൂരുവിന്റെയും വികാഷ് കുമാർ വികാഷിന് വെസ്റ്റ് ബെംഗളൂരുവിന്റെയും എം.ബി. ബൊറലിംഗയ്യയ്ക്ക് നോർത്ത് ബെംഗളൂരുവിന്റെയും സി. വംശി കൃഷ്ണയ്ക്ക് സൗത്ത് ബെംഗളൂരുവിന്റെയും ചുമതല നൽകി. ഹേമന്ത് എം. നിംബാൽക്കറാണ് ട്രാഫിക് വിഭാഗത്തിന്റെ കമ്മീഷണർ.
പുതിയ സംവിധാനത്തിൽ ഓരോ കമ്മീഷണറേറ്റിനും അതത് പരിധിയിലെ ക്രമസമാധാനപാലനം, കുറ്റാന്വേഷണം, പോലീസ് സ്റ്റേഷനുകളുടെ ഏകോപനം എന്നിവയിൽ കൂടുതൽ ഉത്തരവാദിത്വമുണ്ടാകും. നഗരതലത്തിൽ പ്രവർത്തനങ്ങൾ ഏകോപിപ്പിക്കുന്ന ചുമതല ചീഫ് കമ്മീഷണർക്കായിരിക്കും.
നിലവിലെ ബെംഗളൂരു പോലീസ് കമ്മീഷണറായിരുന്ന സെമന്ത് കുമാർ സിങ്ങിനെ കർണാടക സ്റ്റേറ്റ് ഫയർ ആൻഡ് എമർജൻസി സർവീസസിലേക്ക് മാറ്റിയിട്ടുണ്ട്. പുതിയ കമ്മീഷണറേറ്റ് സംവിധാനം പ്രാബല്യത്തിൽ വരുന്നതോടെ നഗരത്തിലെ പോലീസ് ഭരണസംവിധാനത്തിൽ നിർണായകമായ മാറ്റമാണ് ഉണ്ടാകുന്നത്.
SUMMARY: Bengaluru Police to have five commissionerates; R. Hitendra Chief Commissioner of Police















