ബെംഗളൂരു: ഇലക്ട്രോണിക് സിറ്റിയിലേക്കുള്ള നമ്മ മെട്രോ ആർവി റോഡ്-ബൊമ്മസന്ദ്ര പാതയിൽ റെയിൽവേ സുരക്ഷാ കമ്മിഷണറുടെ പരിശോധന ജൂലൈയിൽ നടക്കും. ജൂലൈ 15, 16 തീയതികളിലാകും പരിശോധന നടക്കുകയെന്ന് ബിഎംആർസി അറിയിച്ചു. കമ്മിഷണർ നൽകുന്ന റിപ്പോർട്ടിന്റെ അടിസ്ഥാനത്തിലാണ് പാതയിൽ സർവീസ് നടത്താൻ അനുമതി ലഭിക്കുക.
ബ്രേക്കിങ് സംവിധാനത്തിന്റെ പരീക്ഷണങ്ങൾ ഉൾപ്പെടെ പൂർത്തിയായിട്ടുണ്ട്. നേരത്തേ റിസർച് ഡിസൈൻസ് ആൻഡ് സ്റ്റാന്റേർഡ്സ് ഓർഗനൈസേഷൻ പരീക്ഷണ ഓട്ടം നടത്തി ട്രാക്കിന്റെയും ട്രെയിനിന്റെയും സുരക്ഷ ഉറപ്പാക്കിയിരുന്നു.
18.8 കിലോമീറ്റർ പാതയിൽ 16 സ്റ്റേഷനുകളാണുള്ളത്. പാതയിൽ ഓടിക്കാൻ 3 ഡ്രൈവറില്ലാ ട്രെയിനുകളാണ് ബിഎംആർസിയുടെ പക്കലുള്ളത്. ജൂലൈയിൽ ഒരു ട്രെയിൻ കൂടി ലഭിക്കുമെന്ന് പ്രതീക്ഷിക്കുന്നു. ആദ്യ ഘട്ടത്തിൽ 30 മിനിറ്റ് ഇടവേളയിൽ സർവീസ് തുടങ്ങാനാണ് ഉദ്ദേശിക്കുന്നത്. എന്നാൽ തീയതി സംബന്ധിച്ച് കേന്ദ്ര, സംസ്ഥാന സർക്കാരുകൾ ധാരണയിലെത്തിയിട്ടില്ല.
SUMMARY: CMRS to inspect namma metro yellowline this July
