ചെന്നൈ: തമിഴ്‌നാട്ടില്‍ 70 വയസ്സും അതിനുമുകളില്‍ പ്രായമുള്ളതുമായ മുഴുവൻ മുതിർന്ന പൗരന്മാർക്കും സൗജന്യ ചികിത്സ ലഭ്യമാക്കുന്ന ‘മുഖ്യമന്ത്രിയുടെ വയോജന ആരോഗ്യ ഇൻഷുറൻസ് പദ്ധതി’ പ്രഖ്യാപിച്ചു. വരുമാന പരിധിയില്ലാതെ ഏകദേശം 38 ലക്ഷത്തോളം മുതിർന്ന പൗരന്മാർക്ക് പദ്ധതിയുടെ പ്രയോജനം ലഭിക്കും. തമിഴ്നാട് നിയമസഭയില്‍ ആരോഗ്യവകുപ്പ് മന്ത്രി കെ.ജി. അരുണ്‍രാജാണ് പദ്ധതി പ്രഖ്യാപിച്ചത്.
വിദഗ്ദ്ധ ചികിത്സ ആവശ്യമുള്ള ഗുരുതര രോഗങ്ങള്‍, ഹൃദ്രോഗങ്ങള്‍, അവയവം മാറ്റിവെക്കല്‍ ശസ്ത്രക്രിയകള്‍ തുടങ്ങിയവയ്ക്ക് പദ്ധതിയിലൂടെ സൗജന്യ ചികിത്സ ലഭ്യമാകും. സർക്കാർ ആശുപത്രികള്‍ക്ക് പുറമെ പദ്ധതിയില്‍ ഉള്‍പ്പെടുത്തിയിട്ടുള്ള സ്വകാര്യ ആശുപത്രികള്‍ വഴിയും ഈ ആനുകൂല്യം ലഭിക്കുമെന്ന് മന്ത്രി അറിയിച്ചു. കേന്ദ്ര സർക്കാരിന്റെ ആയുഷ്മാൻ ഭാരത്, തമിഴ്‌നാട്ടിലെ മുഖ്യമന്ത്രിയുടെ സമഗ്ര ആരോഗ്യ ഇൻഷുറൻസ് പദ്ധതി എന്നിവയുമായി സംയോജിപ്പിച്ചായിരിക്കും ഇത് നടപ്പിലാക്കുക.
നിലവില്‍ കുടുംബത്തിന് പ്രതിവർഷം 5 ലക്ഷം രൂപ നിരക്കില്‍ 1.45 കോടി കുടുംബങ്ങള്‍ക്ക് ഈ ഇൻഷുറൻസ് പരിരക്ഷ ലഭിക്കുന്നുണ്ട്. കൂടാതെ, അവയവം മാറ്റിവെക്കല്‍, കോക്ലിയർ ഇംപ്ലാന്റേഷൻ തുടങ്ങിയ സങ്കീർണ്ണമായ ശസ്ത്രക്രിയകള്‍ക്കായി പ്രത്യേക ഫണ്ടില്‍ നിന്ന് 23 ലക്ഷം രൂപ വരെ സഹായം നല്‍കുമെന്നും മുതിർന്ന ഉദ്യോഗസ്ഥർ വ്യക്തമാക്കി.
SUMMARY: Free medical treatment up to ₹23 lakh for those above 70; Tamil Nadu government launches new scheme
