ബെംഗളൂരു: കർണാടകയുടെ തീരദേശ, മലനാട് ജില്ലകളിൽ കനത്ത മഴ. ദക്ഷിണ കന്നഡ ജില്ലയിലെ സുള്ള്യ, സുബ്രഹ്മണ്യ, കടബാ, പുത്തൂർ, ബണ്ട്വാൾ, മംഗളൂരു എന്നിവിടങ്ങളിൽ ശനിയാഴ്ച രാത്രി മുതൽ കനത്ത മഴയാണ് ലഭിച്ചത്. സുബ്രഹ്മണ്യയില്‍ ഗുണ്ടി നദി കരകവിഞ്ഞൊഴുകിയതിനെ തുടർന്ന് തീരദേശങ്ങളിൽ താമസിക്കുന്ന ആളുകളെ മാറ്റിപ്പാർപ്പിച്ചിട്ടുണ്ട്. കനത്ത മഴയിൽ മണ്ണിടിച്ചൽ ഉണ്ടായതിനെ തുടർന്ന് ബെംഗളൂരു മംഗളൂരു റെയിൽവേ പാതയിൽ ശനിയാഴ്ച വൈകുന്നേരം മുതൽ ട്രെയിൻ ഗതാഗതം തടസ്സപ്പെട്ടു.
അടുത്ത അഞ്ചു ദിവസത്തേക്ക് മഴ തുടരും എന്നാണ് കാലാവസ്ഥ കേന്ദ്രത്തിന്റെ (ഐഎംഡി) മുന്നറിയിപ്പ്. ഓഗസ്റ്റ് 17 ന് ഉത്തര കന്നഡ, ഉഡുപ്പി, ചിക്കമഗളൂരു, ദക്ഷിണ കന്നഡ ജില്ലകളിൽ ഓറഞ്ച് അലർട്ട് ഉണ്ടായിരിക്കും. ഓഗസ്റ്റ് 18 ന് ഉത്തര കന്നഡ, ശിവമോഗ, ചിക്കമഗളൂരു എന്നിവിടങ്ങളിൽ റെഡ് അലർട്ട് പ്രഖ്യാപിച്ചിട്ടുണ്ട്, ദക്ഷിണ കന്നഡ, ഹാസൻ, മൈസൂരു, കുടക്, ബാഗൽകോട്ട്, ബെലഗാവി, ധാർവാഡ്, ഗദഗ് ജില്ലകളിൽ ഓറഞ്ച് അലർട്ടും പ്രഖ്യാപിച്ചിട്ടുണ്ട്.
ഐഎംഡിയുടെ മുന്നറിയിപ്പുകൾ കണക്കിലെടുത്ത്, ചിക്കമഗളൂരു ജില്ലാ ഭരണകൂടം വിനോദസഞ്ചാരികൾക്ക് ജാഗ്രതാ നിര്‍ദേശം നൽകിയിട്ടുണ്ട്. ജില്ലയിലെ ദുർബല പ്രദേശങ്ങളിൽ മണ്ണിടിച്ചിൽ ഉണ്ടാകാനുള്ള സാധ്യതയുണ്ടെന്നും അനിഷ്ട സംഭവങ്ങൾ ഒഴിവാക്കാൻ ജനങ്ങൾ ജാഗ്രത പാലിക്കണമെന്നും ഡെപ്യൂട്ടി കമ്മീഷണർ സിഎൻ മീന നാഗരാജ് പറഞ്ഞു. അടിയന്തര സാഹചര്യങ്ങളിൽ 08262-238950 എന്ന ഹെൽപ്പ് ലൈൻ നമ്പറിൽ ബന്ധപ്പെടണമെന്ന് ഡെപ്യൂട്ടി കമ്മീഷണർ പൊതുജനങ്ങളോട് അഭ്യർത്ഥിച്ചു.
SUMMARY: heavy rain; Coastal, Malnad districts of Karnataka red, orange alert
