കോഴിക്കോട്: കനത്ത മഴയുടെ സാധ്യത മുന്നിര്ത്തി സംസ്ഥാനത്ത് രണ്ട് ജില്ലകളില് നാളെ വിദ്യാഭ്യാസ സ്ഥാപനങ്ങള്ക്ക് അവധി പ്രഖ്യാപിച്ചു. കോഴിക്കോട്, വയനാട് ജില്ലകളിലാണ് അവധി പ്രഖ്യാപിച്ചത്. കോഴിക്കോട് ജില്ലയിലെ മലയോര- തീരദേശ മേഖലകളിലും മറ്റും ശക്തമായ മഴയും വെള്ളക്കെട്ടും തുടരുന്നതിനാല് ജില്ലയിലെ പ്രൊഫഷണല് കോളെജുകള് ഒഴികെയുള്ള മുഴുവൻ വിദ്യാഭ്യാസ സ്ഥാപനങ്ങള്ക്കും കോഴിക്കോട് ജില്ല കളക്ടർ അവധി പ്രഖ്യാപിച്ചു.
അങ്കണവാടികള്, മദ്റസകള്, ട്യൂഷൻ സെൻ്ററുകള് എന്നിവക്കും അവധി ബാധകമാണ്. നേരത്തെ നിശ്ചയിച്ച പരീക്ഷകള്, ഓണ്ലൈൻ ക്ലാസുകള് എന്നിവക്ക് അവധി ബാധകമല്ല. കേന്ദ്ര കാലാവസ്ഥ വകുപ്പ് ജാഗ്രതാ നിര്ദേശം നല്കിയ സാഹചര്യത്തില് ജില്ലയിലെ മതപഠന ക്ലാസ്സുകള്, ട്യൂഷന് സെന്ററുകള്, സ്പെഷ്യല് ക്ലാസ്സുകള്, കോച്ചിംഗ് ക്ലാസ്സുകള്ക്ക് വയനാട് ജില്ലാ കളക്ടര് ഡി.ആര് മേഘശ്രീ അവധി പ്രഖ്യാപിച്ചു.
റസിഡന്ഷ്യല് സ്കൂള്, കോളേജുകള്ക്ക് അവധി ബാധകമല്ല. റസിഡന്ഷ്യല് സ്ഥാപനങ്ങളിലെ കുട്ടികളുടെ സുരക്ഷിതത്വം അതത് സ്ഥാപന മേധാവികള് ഉറപ്പാക്കണം. ആവശ്യമെങ്കില് കുട്ടികളുടെ സുരക്ഷ കണക്കിലെടുത്ത് അവധി നല്കാവുന്നതാണെന്നും ജില്ലാ കളക്ടര് അറിയിച്ചു.
SUMMARY: Heavy rain; holiday for educational institutions in two districts tomorrow
