തിരുവനന്തപുരം: സംസ്ഥാനത്ത് ഇന്ന് ഭാഗികമായി വൈദ്യുതി നിയന്ത്രണം ഉണ്ടാകുമെന്ന് കെഎസ്ഇബി. എല്നിനോ പ്രതിഭാസത്തെ തുടർന്നുണ്ടായ മഴക്കുറവും അന്തരീക്ഷ താപനില താരതമ്യേന ഉയർന്ന നിലയില് തുടരുന്നതും മൂലം സംസ്ഥാനത്ത് വൈദ്യുതി ഉപയോഗം മുൻകാലങ്ങളെ അപേക്ഷിച്ച് ഗണ്യമായി വർധിച്ചിരിക്കുകയാണ്. മഴയുടെ കുറവും താരതമ്യേന ഉയർന്ന താപനിലയും വൈദ്യുതി ഉപയോഗം കുത്തനെ ഉയരാൻ കാരണമായെന്നാണ് വിശദീകരണം.
എല്നിനോ പ്രതിഭാസത്തെ തുടർന്നുള്ള മഴക്കുറവ് കാരണം സംസ്ഥാനത്തെ വൈദ്യുതി ഉപഭോഗം മുൻ വർഷങ്ങളെ അപേക്ഷിച്ച് ഗണ്യമായി വർധിച്ചിട്ടുണ്ട്. രാജ്യത്താകെ ആവശ്യകത ഉയർന്നതിനാല് പവർ എക്സ്ചേഞ്ചിലൂടെ ലഭിക്കുന്ന വൈദ്യുതിയുടെ ലഭ്യതയും കുറഞ്ഞിരിക്കുകയാണെന്ന് കെഎസ്ഇബി വ്യക്തമാക്കി.
മഴ മാറിനില്ക്കുന്ന സാഹചര്യത്തില് ഇന്നത്തെ വൈദ്യുതി ഉപയോഗം മുൻ ദിവസങ്ങളെക്കാള് 300 മുതല് 400 മെഗാവാട്ട് വരെ വർധിക്കുമെന്നാണ് വിലയിരുത്തല്. ആവശ്യമായ അളവില് വൈദ്യുതി പവർ എക്സ്ചേഞ്ചില് നിന്ന് ലഭിക്കാത്ത സാഹചര്യമുണ്ടായാല് ഇന്ന് (തിങ്കളാഴ്ച) വൈകിട്ട് ഭാഗിക വൈദ്യുതി നിയന്ത്രണം നടപ്പാക്കേണ്ടിവരുമെന്നും കെഎസ്ഇബി അറിയിച്ചു.
SUMMARY: KSEB says there is a possibility of partial power restrictions in the state tonight
