മെട്രോ യെല്ലോ ലൈൻ ജൂൺ അവസാനത്തോടെ പ്രവർത്തനമാരംഭിക്കും

ബെംഗളൂരു: ബെംഗളൂരു മെട്രോ യെല്ലോ ലൈൻ ഈ വർഷം ജൂൺ അവസാനത്തോടെ പ്രവർത്തനമാരംഭിക്കുമെന്ന് ബിഎംആർസിഎൽ. ഇലക്ടോണിക് സിറ്റിയിലൂടെ കടന്നുപോകുന്ന യെല്ലോ ലൈൻ ആർവി റോഡ് മുതൽ ബൊമ്മസാന്ദ്ര വരെയാണുള്ളത്. പാതയിൽ സർവീസ് നടത്താനുള്ള രണ്ട് ട്രെയിനുകൾ അടുത്തിടെ ബിഎംആർസിഎല്ലിന് ലഭിച്ചിരുന്നു. നിലവിൽ സിഗ്നലിങ് ടെസ്റ്റ് ഉൾപ്പെടെയുള്ള ട്രെയൽ നടപടിക്രമങ്ങൾ പുരോഗമിക്കുകയാണ്. ഇത് പൂർത്തിയാകുന്നതോടെ ബിഎംആർസിഎൽ മെട്രോ റെയിൽവേ സേഫ്റ്റി കമ്മീഷണറുടെ അനുമതി തേടും.

ഏപ്രിൽ അവസാനത്തോടെ മെട്രോ റെയിൽവേ സേഫ്റ്റി കമ്മീഷണറുടെ അനുമതി തേടാനാണ് ബിഎംആർസിഎൽ തീരുമാനം. ഏപ്രിൽ അവസാനം മൂന്നാമത്തെ ട്രെയിനും നഗരത്തിൽ എത്തിച്ചേർന്നേക്കും. ചൈനയിലെ സിആർആർസി നാൻജിങ് പുസൻ കമ്പനി ലിമിറ്റഡ് ആണ് ട്രെയിനുകൾ നിർമിക്കുന്നത്. 2019ൽ 36 ട്രെയിനുകളുടെ ഓർഡർ ബിഎംആർസിഎൽ നാൻജിങ് പുസന് നൽകിയിരുന്നു. 1578 കോടിക്കാണ് കരാർ ധാരണയായത്. സിആർആർസി കൈമാറുന്ന 36 ട്രെയിനുകളിൽ 15 എണ്ണമാണ് യെല്ലോ ലൈനിൽ വിന്യസിക്കുക. ബാക്കി 21 ട്രെയിനുകൾ പർപ്പിൾ, ഗ്രീൻ ലൈനുകൾക്കായി മാറ്റും.

TAGS: NAMMA METRO
SUMMARY: Metro yellow line to be operational by june end