ചെന്നൈ: വിജയ്യുടെ തമിഴക വെട്രി കഴകത്തിൻ്റെ (ടിവികെ) ഈറോഡ് നടത്താന് നിശ്ചയിച്ച റാലിക്ക് പോലീസ് അനുമതി നിഷേധിച്ചു. ഡിസംബര് 16ന് ഈറോഡ് നടത്താന് നിശ്ചയിച്ച റാലിക്കാണ് പോലീസ് അനുമതി നിഷേധിച്ചത്. ഈറോഡ് – പെരുന്തുറൈ റോഡിലെ ഗ്രൗണ്ടില് റാലി നടത്താനായിരുന്നു പാര്ട്ടി അനുമതി തേടിയത്.
എന്നാല് സ്ഥലം സന്ദര്ശിച്ചതിന് പിന്നാലെ പോലീസ് സൂപ്രണ്ട് എ സുജാത അനുമതി നല്കാനാവില്ലെന്ന് അറിയിക്കുകയായിരുന്നു. 70,000 പേരെ പ്രതീക്ഷിക്കുന്നതായാണ് ടിവികെ അറിയിച്ചത്. വന് ജനക്കൂട്ടമുണ്ടാകുമെന്നതും വാഹനങ്ങള് പാര്ക്ക് ചെയ്യാന് മതിയായ സ്ഥലമില്ലയെന്നതും പരിഗണിച്ചാണ് അനുമതി നിഷേധിച്ചത്. ആദ്യം റോഡ് ഷോ നടത്താനായിരുന്നു ടിവികെ പദ്ധതിയിട്ടത്. പിന്നീട് ഇത് സ്വകാര്യ സ്ഥലത്ത് നിയന്ത്രണങ്ങളോടെയുള്ള റാലിക്കായി മാറ്റി അനുമതി തേടുകയായിരുന്നു.
ടിവികെയില് ചേര്ന്ന മുന് എഐഎഡിഎംകെ മന്ത്രി സെങ്കോട്ടയ്യന്റെ ശക്തികേന്ദ്രമാണ് ഈറോഡ്. തന്റെ ജനപിന്തുണ കാണിക്കാനുള്ള അവസരമായാണ് ഈറോഡില് സെങ്കോട്ടയ്യന്റെ നേത്യത്വത്തില് ടിവികെ റാലിക്ക് ഒരുങ്ങിയത്. ഡിസംബർ 9ന് വിജയ് പുതുച്ചേരിയില് റാലി നടത്തുന്നുണ്ട്. ഇതിനായി പുതിയ നിബന്ധനകള് പോലീസ് നല്കിയിരിക്കുകയാണ്.
പങ്കെടുക്കുന്നവരുടെ എണ്ണം, അതിർത്തി നിർണയം എന്നിവയിലാണ് പ്രധാനമായും നിയന്ത്രണം. 41 പേർ കൊല്ലപ്പെട്ട കരൂർ ദുരന്തത്തിന് ശേഷം ടി.വി.കെ നടത്തുന്ന ആദ്യത്തെ റാലിയാണിത്. കരൂർ ദുരന്തത്തിനു ശേഷമാണ് പൊതുയോഗങ്ങള്ക്കും റാലികള്ക്കും തമിഴ്നാട് പൊലിസ് കർശനമായ ഉപാധികളും നിയന്ത്രണങ്ങളും ഏർപ്പെടുത്തി തുടങ്ങിയത്.
SUMMARY: Police deny permission for TVK public meeting
WhatsApp
Telegram
