കാസറഗോഡ്: കാസറഗോഡ് ദേശീയ പാതയില്‍ ഒരേ സമയം നാലു വാഹനങ്ങള്‍ അപകടത്തില്‍പ്പെട്ടു. കാസറഗോഡ് മൊഗ്രാല്‍ പുത്തൂർ ഗ്രാമപഞ്ചായത്ത് ഓഫീസിന് മുന്നില്‍ കല്ലങ്കൈയിയിലാണ് ഇന്ന് പുലർച്ചെ 2:30ന് തുടർച്ചയായി അപകടങ്ങള്‍ ഉണ്ടായത്. ഹൈവേയിലൂടെ പോവുകയായിരുന്ന കാർ സൈഡില്‍ ഇടിച്ചു. പുറകില്‍ ഉണ്ടായിരുന്ന ലോറി കാറിലും അതിന്‍റെ പുറകില്‍ ഉണ്ടായിരുന്ന മൂകാംബികയിലേക്ക് പോകുകയായിരുന്ന ബസ് ലോറിയിലും ഇടിച്ചു.
ഇടിയില്‍ കാറിന്‍റെ ചില്ലുകള്‍ തകർന്നു. ഈവഴി തന്നെ പോവുകയായിരുന്ന ഇരു ചക്ര വാഹനം പെട്ടെന്ന് ബ്രേക്ക്‌ പിടിച്ചതിനാല്‍ നിയന്ത്രണം വിട്ട് ചില്ലുകളിലേക്ക് മറിയുകയും യാത്രക്കാരനായ ഒരാള്‍ക്ക് പരുക്കേല്‍ക്കുകയും ചെയ്തു. ഉടൻ തന്നെ ഫയർഫോഴ്സെത്തി പൊട്ടിയ ചില്ലുകള്‍ റോഡ് സൈഡിലേക്ക് നീക്കം ചെയ്തു. ഇടിച്ച ബസ്സില്‍ ഉണ്ടായിരുന്ന യാത്രക്കാർക്ക് ബസ്സിന്‍റെ മുൻവശ വാതിലിലൂടെ പുറത്തിറങ്ങാൻ സാധിക്കാത്തതിനാല്‍ അഗ്നിരക്ഷാ സേനയുടെ ഏണി വെച്ചു എമർജൻസി ഡോറിലൂടെ സുരക്ഷിതമായി താഴേക്കിറക്കുകയായിരുന്നു. ആർക്കും ഗുരുതര പരുക്കില്ലെന്നാണ് ലഭിക്കുന്ന വിവരം.
SUMMARY: Road accidents on the Kasaragod National Highway: 4 vehicles collided
