ബെംഗളൂരു: സർഗധാര സാംസ്ക്കാരിക സമിതിയുടെ ആഭിമുഖ്യത്തിൽ പ്രശസ്ത നാടകകൃത്ത് ശാർങ്ഗധരൻ്റെ സ്മരണയ്ക്കായി ഏർപ്പെടുത്തിയിട്ടുള്ള 2026 ലെ ശാർങ്ഗധരൻ സ്മാരക സർഗ്ഗധാര പുരസ്ക്കാരം പ്രശസ്ത സാംസ്ക്കാരിക പ്രവർത്തകൻ രാജഗോപാൽ മുള്ളത്തിന് നൽകും.
മാർച്ച് 22 ന് ജാലഹള്ളി നോർത്ത് വെസ്റ്റ് കേരള സമാജം ഹാളിൽ വെച്ച് സർഗ്ഗധാര നടത്തുന്ന സാംസ്കാരിക പരിപാടിയോടനുബന്ധിച്ചാണ് അവാർഡ് ദാനം. സുധാകരൻ രാമന്തളി, കമനീധരൻ തുടങ്ങി പ്രമുഖ സാംസ്ക്കാരിക പ്രവർത്തകർ പങ്കെടുക്കും. ഒപ്പം വനിതാ ദിനാചരണവും നടക്കും. ഡോ. പ്രിയ വിനോദ് മുഖ്യ പ്രഭാഷണം നടത്തും. യുവഗായിക ശ്രീലക്ഷ്മി ജയചന്ദ്രനെ ആദരിയ്ക്കും. നാടകഗാനങ്ങളുടെ അവതരണവും നടക്കും.
പാലക്കാട് തച്ചമ്പാറ സ്വദേശിയായ രാജഗോപാലന് മുള്ളത്ത് കഴിഞ്ഞ 40 വര്ഷത്തോളമായി ബെംഗളൂരുവിലാണ് താമസം. എയർഫോഴ്സിലും ബിഇഎല്ലിലും ഉദ്യോഗസ്ഥനായിരുന്നു. കേരളസമാജം ബാംഗ്ലൂര് അടക്കം ബെംഗളൂരുവിലെ നിരവധി സാംസ്കാരിക സംഘടനകളില് സജീവ സാന്നിധ്യമായ രാജഗോപാലന് നിലവില് കൈരളി നികേതൻ എഡ്യുക്കേഷന് ട്രസ്റ്റ് വൈസ് പ്രസിഡണ്ടാണ്.
SUMMARY: Sarngadharan Memorial Sargadhara Award to Rajagopal Mullath
