തിരുവനന്തപുരം: വിനോദസഞ്ചാര കേന്ദ്രമായ പൊന്മുടി സന്ദർശനത്തിനെത്തിയ യുവതി വിതുര ചന്തമുക്ക് താവയ്ക്കല് ആറ്റില് വീണ് മുങ്ങിമരിച്ചു. തിരുവനന്തപുരം കമലേശ്വരം മണക്കാട് തോട്ടം പൂവങ്കല് ഹൗസില് അനുപമ (26) ആണ് മരണപ്പെട്ടത്. വ്യാഴാഴ്ച ഉച്ചയ്ക്ക് 1:30-ഓടെയായിരുന്നു നാടിനെ നടുക്കിയ ദാരുണ സംഭവം നടന്നത്.
താവയ്ക്കല് ആറ്റിലെ പടിക്കട്ടില് കൂടി സുഹൃത്തുമൊത്ത് നടക്കുന്നതിനിടയില്, കാല്വഴുതി സുഹൃത്ത് ആറ്റില് വീണു. സുഹൃത്തിനെ രക്ഷിക്കാന് ശ്രമിക്കുന്നതിനിടെ അനുപമയും ആറ്റില് വീഴുകയായിരുന്നു. ഈ സമയം സംഭവസ്ഥലത്തിന് സമീപമുണ്ടായിരുന്ന ബംഗാള് സ്വദേശികളായ തൊഴിലാളികള് ഉടൻ തന്നെ ആറ്റിലേക്ക് ചാടി അനുപമയെ കരയ്ക്കെത്തിച്ചു.
തുടർന്ന് ഉടനടി സമീപത്തെ ആശുപത്രിയില് എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം നിലവില് ആശുപത്രി മോർച്ചറിയില് സൂക്ഷിച്ചിരിക്കുകയാണ്. വിതുര പോലീസ് സംഭവത്തില് മേല്നടപടികള് സ്വീകരിച്ചു വരുന്നു.
SUMMARY Technopark employee drowns in river while trying to save friend
