ബെംഗളൂരു: എയ്റോ ഇന്ത്യ പരിപാടിയിൽ പങ്കെടുക്കാനെത്തുന്നവർ സന്ദർശക പാസിൽ നൽകിയ റൂട്ടിൽ മാത്രം യാത്ര ചെയ്യണമെന്ന് നിർദേശിച്ച് ബെംഗളൂരു സിറ്റി പോലീസ്. തിങ്കളാഴ്ച യെലഹങ്ക എയർഫോഴ്സ് സ്റ്റേഷനിലാണ് എയ്റോ ഇന്ത്യയ്ക്ക് തുടക്കമായത്. ഫെബ്രുവരി 14നാണ് പരിപാടിയുടെ സമാപനം. 13, 14 തിയതികളിലാണ് പൊതുജനങ്ങൾക്ക് പരിപാടിയിൽ പ്രവേശനമുള്ളത്. എയ്റോ ഷോ കാണാൻ നേരത്തെ പാസ് എടുത്ത പൊതുജനങ്ങൾക്ക് പാസിനൊപ്പം തന്നെ പാർക്കിംഗ് പാസുകളും നൽകിയിട്ടുണ്ട്.
പരിപാടിയിൽ പങ്കെടുക്കാൻ എത്തുന്നവർ പാർക്കിംഗ് പാസ് തങ്ങളുടെ വാഹനത്തിന്റെ ഗ്ലാസുകളിൽ പതിപ്പിച്ചിരിക്കണം. ഇത് കൂടാതെ, ടിക്കറ്റുകളിലും പാസുകളിലും ക്യൂആർ കോഡിൽ പറഞ്ഞിരിക്കുന്നതുപോലെ റൂട്ട് പാലിക്കേണ്ടതാണ്. റൂട്ട് മാറിയുള്ള സഞ്ചാരം അനുവദിക്കില്ല.
ഗേറ്റ് നമ്പർ 08 മുതൽ 11 വരെയുള്ള എയർ ഡിസ്പ്ലേ വ്യൂ ഏരിയയുടെ പാസുള്ളവർ കൊടിഗെഹള്ളി ജംഗ്ഷൻ മേൽപ്പാലത്തിനു താഴെയുള്ള സർവീസ് റോഡ് വഴി വേദിയിലേക്ക് പ്രവേശിക്കണം. ബൈതരായണപുര ജംഗ്ഷൻ, ജികെവികെ ജംഗ്ഷൻ, യെലഹങ്ക ബൈപ്പാസ് ജംഗ്ഷൻ (ഇടത് തിരിവ്), ദൊഡ്ഡബല്ലാപുര മെയിൻ റോഡ്, നാഗേനഹള്ളി ഗേറ്റ് (വലത് തിരിവ്), ഗന്തിഗനഹള്ളി വഴിയാണ് സർവീസ് റോഡിലേക്ക് എത്തുന്നത്. മടക്കയാത്രയ്ക്കും ഇതേ റൂട്ട് ഉപയോഗിക്കേണ്ടതാണ്.
ഡൊമസ്റ്റിക് ഏരിയയിലെ ഗേറ്റ് നമ്പർ 5ന്റെ പാർക്കിംഗ് പാസുള്ള സന്ദർശകർ എയർപോർട്ട് റോഡ് വഴി മുന്നോട്ട് വന്ന്, ഐഎഫ് ഹുനസെമാരനഹള്ളിയിലെ ഫ്ലൈ ഓവർ വഴി യു-ടേൺ എടുത്ത് സർവീസ് റോഡ് വഴി വേദിയിൽ എത്തണം. മടക്കയാത്രയ്ക്ക്, ഗേറ്റ് നമ്പർ 5 എ വഴി പുറത്തിറങ്ങി രെവ കോളേജ് ജംഗ്ഷൻ വഴി പോകാം.
കെംപഗൗഡ അന്താരാഷ്ട്ര വിമാനത്താവളത്തിലേക്കുള്ള യാത്രക്കാർ ബദൽ റൂട്ടുകൾ തിരഞ്ഞെടുക്കണമെന്നും പോലീസ് നിർദേശിച്ചു. യെലഹങ്ക റൂട്ട് ഒഴിവാക്കി പകരം ഹെന്നൂർ – ബാഗലൂർ വഴി ബദൽ റോഡ് ആണ് തിരഞ്ഞെടുക്കേണ്ടത്. ജികെവികെ കാമ്പസിലും ജക്കൂർ എയർഫീൽഡിലും ആണ് വാഹനങ്ങൾക്ക് പാർക്കിങ് സൗകര്യം ഏർപ്പെടുത്തിയിരിക്കുന്നത്. സ്വകാര്യ വാഹനങ്ങളിൽ വരുന്നവർക്കായി ജികെവികയിൽ ആണ് പാർക്കിങ് സൗകര്യം ഒരുക്കിയിട്ടുള്ളത്. ജികെവികെയിൽ നിന്ന് ബിഎംടിസി ബസുകൾ യെലഹങ്ക എയർഫോഴ്സ് സ്റ്റേഷനിലേക്ക് സന്ദർശകരെ കടത്തിവിടും.
TAGS: AERO INDIA
SUMMARY: Visitors for Aero India advised to travel in pass routes only
WhatsApp
Telegram
