ബെംഗളൂരു: നഗരത്തിൽ 23 ഇടങ്ങളിൽ കൂടി പേ-ആൻഡ്-പാർക്ക് സംവിധാനം വരുന്നു. സെൻട്രൽ ബിസിനസ് ഡിസ്ട്രിക്റ്റ് (CBD) ഉൾപ്പെടെ ആറ് പാക്കേജുകളിലായി 23 ഇടനാഴികളിൽ ഇതിനായി ഗ്രേറ്റർ ബെംഗളൂരു അതോറിറ്റി (ജിബിഎ) ടെൻഡറുകൾ ക്ഷണിച്ചു. ആദ്യഘട്ടത്തിൽ ബെംഗളൂരു സെൻട്രൽ, വെസ്റ്റ്, സൗത്ത് സിറ്റി കോർപ്പറേഷനുകളിലും തുടര്ന്നു നഗരത്തിലുടനീളം ഇത് വ്യാപിപ്പിക്കുമെന്ന് ജിബിഎ ചീഫ് കമ്മീഷണർ എം. മഹേശ്വർ റാവു അറിയിച്ചു.
എം.ജി. റോഡിൽ ഈ സംവിധാനം നേരത്തെ നടപ്പിലാക്കിയിട്ടുണ്ട്. പുതിയ സംവിധാനം പ്രാബല്യത്തില് വരുന്നതോടെ സെന്റ് ജോൺസ് റോഡ്, ചർച്ച് സ്ട്രീറ്റ്, ടാങ്ക് ബണ്ട് റോഡ്, കൊമേഴ്സ്യൽ സ്ട്രീറ്റ്, മെയിൻ ഗാർഡ് റോഡ്, ശങ്കർ മഠം, പമ്പ മഹാകവി റോഡ്, ഡിക്കിൻസൺ റോഡ്, ബിവികെ അയ്യങ്കാർ റോഡ്, വസവി റോഡ്, വാണി വിലാസ് റോഡ്, കനകപുര ഡയഗണൽ റോഡ്, പ്ലാനറ്റേറിയം, മില്ലേഴ്സ് റോഡ്, പാട്ടലംമ, മരിയപ്പ റോഡ് എന്നിവിടങ്ങളിലും പേ-ആൻഡ്-പാർക്ക് നിലവിൽ വരും’, എം. മഹേശ്വർ റാവു പറഞ്ഞു.
ഓൺലൈൻ പാർക്കിംഗ് സ്ലോട്ടുകളും ലഭ്യമാകും. ഫീസ് ശേഖരണ ചുമതല സ്വകാര്യ ഓപ്പറേറ്റർമാർക്കാണ്. കാറുകൾക്ക് മണിക്കൂറിന് 30 രൂപ, പ്രതിദിനം 150 രൂപ; ഇരുചക്രവാഹനങ്ങൾക്ക് മണിക്കൂറിന് 15 രൂപ, പ്രതിദിനം 75 രൂപ എന്നിങ്ങനെയാണ് നിരക്കുകൾ. നഗരത്തിലെ ഗതാഗത തിരക്ക് കുറയ്ക്കുന്നതോടൊപ്പം അനധികൃത പാർക്കിംഗ് തടയുക, വാർഷിക വരുമാനം വർദ്ധിപ്പിക്കുക എന്നിവ ലക്ഷ്യമിട്ടാണ് നടപടി.
SUMMARY: Parking fees to be imposed at 23 more places in Bengaluru
