മുംബൈ ഇന്ത്യൻസ് ബാറ്റർ ടിം ഡേവിഡിനും ബാറ്റിങ് പരിശീലകൻ കിറോൺ പൊള്ളാർഡിനും ഐപിഎല്ലിൽ പിഴ ചുമത്തി. ഐപിഎൽ പെരുമാറ്റച്ചട്ടം ലംഘിച്ചതിന് മാച്ച് ഫീയുടെ 20 ശതമാനമാണ് പിഴ ചുമത്തിയത്.
വ്യാഴാഴ്ച നടന്ന പഞ്ചാബ് കിങ്സിനെതിരായ മത്സരത്തിനിടെയുള്ള നടപടിയാണ് ഇരുവർക്കുമെതിരെ പിഴ ചുമത്തുന്നതിലേക്കെത്തിച്ചത്. പഞ്ചാബിനെതിരായ മത്സരത്തിൽ മുംബൈ ബാറ്റ് ചെയ്യുന്നതിനിടെയാണ് സംഭവം. 15-ാം ഓവർ എറിഞ്ഞ അർഷ്ദീപിന്റെ അവസാന പന്ത് ഒരു വൈഡ് യോർക്കറായിരുന്നു. സൂര്യകുമാർ യാദവായിരുന്നു ബാറ്റ് ചെയ്തിരുന്നത്. അമ്പയർ വൈഡ് നൽകിയില്ല.
എന്നാൽ ടി.വി. കാമറകൾ ഇത് വൈഡ് ആണെന്ന് കാണിച്ചിരുന്നു. ഇതിനിടെ ടിം ഡേവിഡും കിറോൺ പൊള്ളാർഡും റിവ്യൂ നൽകുന്നതിന് സൂര്യകുമാർ യാദവിന് ആക്ഷൻ കാണിച്ചു. തുടർന്നാണ് സൂര്യകുമാർ റിവ്യൂ ആവശ്യപ്പെട്ടത്. തേർഡ് അമ്പയർ പരിശോധിച്ച ശേഷം ഇത് വൈഡാണെന്ന് വ്യക്തമാക്കുകയും ചെയ്തു.
കളിക്കാർക്കും ടീം ഒഫീഷ്യൽസിനും വേണ്ടിയുള്ള ഐപിഎൽ പെരുമാറ്റച്ചട്ടത്തിന്റെ ആർട്ടിക്കിൾ 2.15 (ബി) പ്രകാരം റിവ്യൂ നൽകുന്നതിന് പുറത്ത് നിന്ന് സഹായം തേടുന്നത് തെറ്റാണ്. ഇതാണ് ടിം ഡേവിഡിനും പൊള്ളാർഡിനുമെതിരെ നടപടിയെടുക്കാൻ കാരണമായത്.
The post പൊള്ളാര്ഡിനും ടിം ഡേവിഡിനു പിഴ ചുമത്തി appeared first on News Bengaluru.
WhatsApp
Telegram
