ഏഷ്യൻ ചാമ്പ്യൻസ് ട്രോഫി; ജപ്പാനെ തോൽപിച്ച് ഇന്ത്യൻ വനിതാ ഹോക്കി ടീം ഫൈനലിൽ

രാജ്ഗിർ: ഏഷ്യൻ ചാമ്പ്യൻസ് ട്രോഫി സെമി ഫൈനൽ പോരാട്ടത്തിൽ ജപ്പാനെ എതിരില്ലാത്ത രണ്ട് ഗോളുകൾക്ക് തോൽപ്പിച്ച് ഇന്ത്യൻ വനിതാ ഹോക്കി ടീം ഫൈനലിൽ പ്രവേശിച്ചു. ഗോൾ രഹിതമായ ആദ്യ പകുതിക്ക് ശേഷം അവസാന ക്വാർട്ടറിലാണ് ഇന്ത്യ തങ്ങളുടെ രണ്ട് ഗോളുകളും നേടിയത്.

48-ാം മിനിറ്റിൽ നവനീത് കൗറിലൂടെയായിരുന്നു ആദ്യ ഗോൾ. പെനാൽറ്റി സ്ട്രോക്ക് താരം ഗോളാക്കി മാറ്റുകയായിരുന്നു. സമനില പിടിക്കാൻ ജപ്പാൻ ശക്തമായി തിരിച്ചടിച്ചെങ്കിലും ഇന്ത്യൻ പ്രതിരോധം മികച്ചുനിന്നു. 56-ാം മിനിറ്റിൽ ലാൽറംസിയാമിയും ഗോൾ നേടിയതോടെ ലീഡ് രണ്ടാക്കി.

ഇതോടെയാണ് ഇന്ത്യ ഫൈനലിലേക്ക് പ്രവേശിച്ചത്. ഫൈനലിൽ ചൈനയാണ് ഇന്ത്യയുടെ എതിരാളി. സെമിയിൽ മലേഷ്യയെ ഒന്നിനെതിരെ മൂന്ന് ഗോളുകൾക്കാണ് ചൈന തോൽപ്പിച്ചത്. മൂന്നാം സ്ഥാനത്തിനായുള്ള പോരാട്ടം ജപ്പാനും മലേഷ്യയും തമ്മിൽ നടക്കും. ജപ്പാന്‍ ഗോളി കുഡോ ആണ് കളിയിലെ താരമായത്.

TAGS: SPORTS | HOCKEY
SUMMARY: Indian eomen hockey team enters final in Asian Champions Trophy