ബെംഗളൂരു: നിയന്ത്രണം വിട്ട ബൈക്ക് റോഡിൽ മറിഞ്ഞുണ്ടായ അപകടത്തിൽ ഒരാൾ മരിച്ചു. തിങ്കളാഴ്ച പുലർച്ചെ സദാശിവനഗറിലാണ് അപകടമുണ്ടായത്. അസം സ്വദേശിയായ വിജയ് മഡിക്കിയാണ് (21) മരിച്ചത്. ചെറിയ പെരുന്നാളിന് പുതിയ വസ്ത്രങ്ങൾ വാങ്ങിയ ശേഷം വീട്ടിലേക്ക് പോകവേയാണ് വിജയ് അപകടത്തിൽ പെട്ടത്. വിജയ്ക്കൊപ്പം സുഹൃത്തായ സുഹൈലും യാത്ര ചെയ്തിരുന്നു.
അപകടത്തിൽ പരുക്കേറ്റ ഇയാളെ സമീപത്തെ ആശുപത്രിയിൽ പ്രവേശിപ്പിച്ചു. ഇരുവരും സ്വകാര്യ സ്ഥാപനത്തിലെ ജീവനക്കാരായിരുന്നു. വസ്ത്രങ്ങൾ സൂക്ഷിച്ച കവർ ബൈക്കിന്റെ ഹാൻഡിലിൽ കുടുങ്ങിയാണ് നിയന്ത്രണം നഷ്ടപ്പെട്ടതെന്ന് പോലീസ് പറഞ്ഞു. സദാശിവനഗറിലെ ഒരു വാടക വീട്ടിലാണ് ഇരുവരും താമസിച്ചിരുന്നത്. പ്രാഥമിക അന്വേഷണത്തിൽ ഇരുവരും ഹെൽമെറ്റ് ധരിച്ചിരുന്നില്ല എന്ന് കണ്ടെത്തിയതായി പോലിസ് പറഞ്ഞു. സംഭവത്തിൽ സദാശിവനഗർ ട്രാഫിക് പോലീസ് കേസെടുത്തു.
TAGS: BENGALURU | ACCIDENT
SUMMARY: Man dies in bike ACCIDENT in Bengaluru
