തെരുവോരങ്ങളിൽ വിൽക്കുന്ന ഭക്ഷണങ്ങളിൽ രാസവസ്തുക്കൾ കണ്ടെത്തിയതായി റിപ്പോർട്ട്‌

ബെംഗളൂരു: തെരുവോരങ്ങളിൽ വിൽക്കുന്ന ഭക്ഷണങ്ങളിൽ രാസവസ്തുക്കൾ കണ്ടെത്തിയതായി റിപ്പോർട്ട്‌. സംസ്ഥാന ഭക്ഷ്യവിതരണ വിഭാഗവും, ആരോഗ്യ വകുപ്പും സംയുക്തമായി നടത്തിയ പരിശോധനയിലാണ് ഇത്തരം ഭക്ഷണങ്ങളിൽ ഗുണനിലവാരം ഇല്ലെന്ന് കണ്ടെത്തിയിരിക്കുന്നത്. ഗോബി മഞ്ചൂരിയൻ, കബാബ് എന്നിവയിൽ ഉപയോഗിക്കുന്ന ഫുഡ് കളറിംഗ് ഏജന്റുകളിലെ രാസവസ്തുക്കൾ സംസ്ഥാനത്ത് ഇതിനകം നിരോധിച്ചിട്ടുണ്ട്.

കഴിഞ്ഞ മൂന്ന് മാസത്തിനുള്ളിൽ, ബെംഗളൂരുവിലെ വിവിധ തെരുവുകളിൽ വിൽക്കുന്ന 1,585 ഭക്ഷണ സാമ്പിളുകളാണ് വിശകലനത്തിനായി അയച്ചു. ഇതിൽ 24 ഇനം ഭക്ഷണ സാമ്പിളുകൾ നിലവാരമില്ലാത്തതാണെന്ന് ലബോറട്ടറി റിപ്പോർട്ടുകൾ കണ്ടെത്തി. ഭക്ഷണത്തിൽ മായം ചേർക്കുന്നത് തടയാൻ, നിയമനടപടി സ്വീകരിക്കുമെന്ന് ആരോഗ്യ വകുപ്പ് അറിയിച്ചു. ഭക്ഷണത്തിൽ മായം ചേർക്കുന്നത് തടയുന്നതിനും സുരക്ഷ ഉറപ്പാക്കുന്നതിനും ഭക്ഷ്യസുരക്ഷാ വകുപ്പും നിയമനടപടികൾ സ്വീകരിക്കുന്നുണ്ട്.

ശുചിത്വം പാലിക്കാത്ത വ്യാപാരികൾക്കെതിരെ അച്ചടക്ക നടപടി സ്വീകരിക്കാൻ ബെംഗളൂരു അർബൻ ജില്ലാ കമ്മീഷണർ ജഗദീഷ് ജി. ഉദ്യോഗസ്ഥർക്ക് നിർദ്ദേശം നൽകി. പാചകത്തിനായുള്ള എണ്ണ ആവർത്തിച്ച് ഉപയോഗിക്കരുതെന്ന് തെരുവ് ഭക്ഷണ വിൽപ്പനക്കാർക്ക് അദ്ദേഹം നിർദ്ദേശം നൽകിയിട്ടുണ്ട്.

TAGS: BENGALURU | STREET FOODS
SUMMARY: Food samples sold by street vendors found to be unsafe