തിരുവനന്തപുരം: യുഡിഎഫ് സർക്കാർ അധികാരമേറ്റതിനു പിന്നാലെ സെക്രട്ടേറിയറ്റില്‍ മന്ത്രിമാർക്കായി ഔദ്യോഗിക ഓഫീസുകള്‍ ഒരുങ്ങി. സർക്കാരിന്റെ സുഗമമായ പ്രവർത്തനങ്ങള്‍ക്കായി വിപുലമായ മാറ്റങ്ങളോടെയാണ് ഓഫീസുകള്‍ സജ്ജീകരിച്ചിരിക്കുന്നത്. സെക്രട്ടേറിയറ്റ് നോർത്ത് ബ്ലോക്കിന്റെ മൂന്നാം നിലയിലാണ് മുഖ്യമന്ത്രിയുടെയും കുഞ്ഞാലിക്കുട്ടിയുടെയും ഓഫീസുകള്‍ ക്രമീകരിച്ചിരിക്കുന്നത്.
മന്ത്രിസഭയിലെ രണ്ടാമനും ആഭ്യന്തരമന്ത്രിയുമായ രമേശ് ചെന്നിത്തലയുടെ ഓഫീസ് നോർത്ത് ബ്ലോക്കിന്റെ രണ്ടാം നിലയിലായിരിക്കും. മുമ്പ് ആഭ്യന്തര വകുപ്പ് കൈകാര്യം ചെയ്തപ്പോഴുള്ള തന്റെ പഴയ ഓഫീസിലേക്ക് തന്നെയാണ് ചെന്നിത്തല ഇത്തവണയും തിരിച്ചെത്തുന്നത്. ചെന്നിത്തലയെ കൂടാതെ പി.കെ.കുഞ്ഞാലിക്കുട്ടി, എ.പി.അനില്‍കുമാർ എന്നിവർ മുമ്പ് മന്ത്രിമാരായിരുന്നപ്പോള്‍ ഉപയോഗിച്ചിരുന്ന അതേ പഴയ ഓഫീസുകള്‍ തന്നെ ഇത്തവണയും തിരഞ്ഞെടുത്തത്.
സത്യപ്രതിജ്ഞയ്ക്ക് ശേഷം മന്ത്രിമാർ സെക്രട്ടേറിയറ്റിലെ ഓഫീസുകളിലെത്തി ചുമതലയേല്‍ക്കും. തുടർന്ന് ക്യാബിനറ്റ് ചേരും. ആദ്യമന്ത്രിസഭാ യോഗത്തില്‍ തന്നെ ജനപ്രീയ പദ്ധതികള്‍ പ്രഖ്യാപിക്കുമെന്ന് റിപ്പോർട്ടുകളുണ്ട്.
SUMMARY: The Chief Minister’s office is on the third floor of North Block; the offices of the ministers are also ready
