തിരുവനന്തപുരം: എന്ഫോഴ്സ്മെന്റ് ഡയറക്ടറേറ്റ് (ഇ.ഡി) ഉദ്യോഗസ്ഥരെ അക്രമിച്ച കേസ് അന്വേഷിക്കാന് പ്രത്യേക പോലീസ് സംഘത്തെ നിയോഗിച്ചു. കണ്ന്റോണ്മെന്റ് എ.സി.പിയുടെ നേരിട്ടുള്ള മേല്നോട്ടത്തിലായിരിക്കും പ്രത്യേക സംഘത്തിന്റെ അന്വേഷണം. അന്വേഷണ ചുമതലയിലുണ്ടായിരുന്ന മ്യൂസിയം എസ്.എച്ച്.ഒ പ്രശാന്തിനെ അന്വേഷണ സംഘത്തില്നിന്നും പൂര്ണമായും ഒഴിവാക്കിയിട്ടുണ്ട്. വീഴ്ചകള് സംഭവിച്ചെന്ന വിലയിരുത്തലിനെ തുടര്ന്നാണ് ഇദ്ദേഹത്തെ മാറ്റിയതെന്നാണ് സൂചന. എസിപിയുടെ നേതൃത്വത്തിലുള്ള പുതിയ സംഘം അടിയന്തരമായി യോഗം ചേര്ന്ന് തുടര്നടപടികള് നിശ്ചയിക്കും. അതിവേഗ കുറ്റപത്രം കേസില് നല്കും.
നാല് എസ്.എച്ച്.ഒമാര് (സര്ക്കിള് ഇന്സ്പെക്ടര്മാര്) അടങ്ങുന്ന മുപ്പതംഗ വിപുലമായ ടീമാണ് കേസ് അന്വേഷിക്കുക. സംഭവത്തിന്റെ ഗൗരവം കണക്കിലെടുത്താണ് സിറ്റി പോലീസ് കമ്മീഷണറുടെ നിര്ദേശപ്രകാരം അന്വേഷണം പ്രത്യേക സംഘത്തിന് കൈമാറിയിരിക്കുന്നത്. ആക്രമണത്തിന് പിന്നിലെ ഗൂഢാലോചനയടക്കം സംഘം വിശദമായി പരിശോധിക്കും. ഇ.ഡി ഉദ്യോഗസ്ഥര്ക്ക് നേരെ ആക്രമണം ഉണ്ടായ സമയത്ത് ഉന്നത പോലീസ് ഉദ്യോഗസ്ഥര് സ്ഥലത്ത് എത്താതിരുന്നതിനെക്കുറിച്ച് ഇപ്പോള് അന്വേഷണമില്ലെന്നാണ് ലഭ്യമാകുന്ന വിവരം. അക്രമം തടയുന്നതിലും കൃത്യസമയത്ത് ഇടപെടുന്നതിലും പോലീസിന് വീഴ്ച പറ്റി എന്ന ആക്ഷേപം ശക്തമായി നിലനില്ക്കുന്നുണ്ട്. എന്നാല്, നിലവില് ഉന്നത ഉദ്യോഗസ്ഥരുടെ ഭാഗത്തുനിന്നുണ്ടായ അനാസ്ഥയെക്കുറിച്ചുള്ള അന്വേഷണത്തിന് പോലീസ് മുതിര്ന്നിട്ടില്ല. പ്രതികളെ പിടികൂടുന്നതിനാണ് ഇപ്പോള് മുന്ഗണന നല്കുന്നത്.
ഔദ്യോഗിക കൃത്യനിര്വഹണത്തിനിടെ കേന്ദ്ര ഏജന്സിയുടെ ഉദ്യോഗസ്ഥര്ക്ക് നേരെ പരസ്യമായ ആക്രമണം ഉണ്ടായത് ക്രമസമാധാന നിലയെക്കുറിച്ചുള്ള ഗുരുതരമായ ചോദ്യങ്ങളാണ് ഉയര്ത്തുന്നത്. അക്രമികള്ക്കെതിരേ ശക്തമായ വകുപ്പുകള് ചുമത്തിയാണ് പോലീസ് കേസെടുത്തിരിക്കുന്നത്. കേസില് ഉള്പ്പെട്ടിട്ടുള്ള മുഴുവന് പ്രതികളെയും ഉടന് തന്നെ നിയമത്തിന് മുന്നില് കൊണ്ടുവരുമെന്ന് സര്ക്കാര് വിശദീകരീച്ചിട്ടുണ്ട്. ഇഡി ഉദ്യോഗസ്ഥര്ക്കെതിരായ ആക്രമണത്തിന് പിന്നില് രാഷ്ട്രീയ ഗൂഢാലോചനയുണ്ടോ എന്നും പരിശോധിക്കും. പ്രദേശത്തെ സി.സി.ടിവി ദൃശ്യങ്ങളും മൊബൈല് ടവര് ലൊക്കേഷനുകളും കേന്ദ്രീകരിച്ചുള്ള ശാസ്ത്രീയ അന്വേഷണവും ഇതിനോടകം ആരംഭിച്ചിട്ടുണ്ട്.
