തിരുവനന്തപുരം: സ്ഥലം മാറ്റത്തിലെ സ്റ്റേ ഹൈക്കോടതി നീക്കിയതോടെ എറണാകുളം പബ്ലിക് ഹെല്ത്ത് ലാബ് ഡയറക്ടറായി ഡോ റീന കെ ജെ ചുമതലയേറ്റു. ജോയിനിങ് റിപ്പോർട്ടില് പ്രതിഷേധം രേഖപ്പെടുത്തിയ റീന അഡ്മിനിസ്ട്രേറ്റീവ് ട്രൈബ്യൂണലിലെ പോരാട്ടം തുടരുമെന്നും ജോയിനിംഗ് ലെറ്ററില് വ്യക്തമാക്കി. സ്ഥലംമാറ്റ ഉത്തരവ് തടഞ്ഞുളള അഡ്മിനിസ്ട്രേറ്റീവ് ട്രൈബ്യൂണലിന്റെ സ്റ്റേ ഹൈക്കോടതി ഇന്നലെയാണ് റദ്ദാക്കിയത്.
എന്നാല് തന്നെ സ്ഥലം മാറ്റിയത് നിയമവിരുദ്ധമായിട്ടാണെന്നായിരുന്നു റീനയുടെ വാദം. എല്ലാ നടപടി ക്രമങ്ങളും പാലിച്ചായിരുന്നു റീനയുടെ സ്ഥലം മാറ്റമെന്ന് സര്ക്കാര് കോടതിയെ അറിയിച്ചു. അവരെ ഏതെങ്കിലും തരത്തില് തരംതാഴ്ത്തുകയോ മറ്റോ ചെയ്തിട്ടില്ല. തത്തുല്യമായ മറ്റൊരു തസ്തികയിലേക്ക് മാറ്റുകയാണ് ചെയ്തതെന്നും അവരുടെ ഡെപ്യൂട്ടേഷന് കാലാവധി അവസാനിച്ചെന്നുമുള്ള സര്ക്കാര് വാദങ്ങള് ഹൈക്കോടതി ഡിവിഷന് ബെഞ്ച് ശരിവയ്ക്കുകയായിരുന്നു.
ട്രൈബ്യൂണല് നടപടി ക്രമങ്ങളിലുണ്ടായ വീഴ്ചകള് എണ്ണിപ്പറഞ്ഞാണ് ഹൈക്കോടതി ഡിവിഷന് ബെഞ്ച് സര്ക്കാര് നടപടി ശരിവച്ചത്. ഡിഎച്ച്എസ് സ്ഥാനത്തു നിന്ന് ഡോക്ടര് റീനയെ ജൂണ് 12നാണ് സര്ക്കാര് സ്ഥലം മാറ്റിയത്. ജൂണ് 13ന് ഡോ. മീനാക്ഷി ഡിഎച്ച്എസിന്റെ ചുമതലയേറ്റെടുക്കുകയും ചെയ്തു. തുടർന്ന് ജൂണ് 18നാണ് റീനയുടെ സ്ഥലം മാറ്റം സ്റ്റേ ചെയ്തുളള അഡ്മിനിസ്ട്രേറ്റീവ് ട്രൈബ്യൂണല് ഉത്തരവ് വന്നത്.
SUMMARY: Dr. Reena takes charge as Ernakulam Public Health Lab Director after controversy
