ബെംഗളൂരു: കർണാടകയിൽ വരൾച്ച രൂക്ഷമായതോടെ സംസ്ഥാനത്തെ 240 താലൂക്കുകളിൽ 217 എണ്ണവും വരൾച്ചാബാധിതമായി പ്രഖ്യാപിച്ചു. കൃഷിനാശം വ്യാപകമായതും ദുരിതാശ്വാസത്തിനുള്ള ചെലവ് വർധിക്കുന്നതും സംസ്ഥാന സർക്കാരിന് സാമ്പത്തിക സമ്മർദം സൃഷ്ടിച്ചിരിക്കുകയാണ്.
കർഷകർക്കുള്ള നഷ്ടപരിഹാരം, കുടിവെള്ള വിതരണം, കാലിത്തീറ്റ ലഭ്യമാക്കൽ തുടങ്ങിയ ആവശ്യങ്ങൾക്കായി അധിക ധനസമാഹരണം നടത്തേണ്ട സാഹചര്യമുണ്ട്.
വരൾച്ചാബാധിത പ്രദേശങ്ങളിലെ കൃഷിനാശം വിലയിരുത്തിയതിന്റെ അടിസ്ഥാനത്തിൽ 177 താലൂക്കുകളിലെ നഷ്ടം ഏകദേശം 46,000 കോടി രൂപയായി കണക്കാക്കിയിട്ടുണ്ട്.
ശേഷിക്കുന്ന താലൂക്കുകളിലെ നഷ്ടവിലയിരുത്തൽ തുടരുകയാണ്. ആകെ സാമ്പത്തിക നഷ്ടം 50,000 കോടി മുതൽ 60,000 കോടി രൂപവരെ ഉയരാമെന്നാണ് ഉപമുഖ്യമന്ത്രിയും റവന്യൂ മന്ത്രിയുമായ ജി. പരമേശ്വര അറിയിച്ചത്.
വരൾച്ചയുടെ ആഘാതം നേരിടുന്ന കർഷകർക്ക് സഹായം എത്തിക്കുന്നതിനായി സംസ്ഥാന സർക്കാർ കേന്ദ്രത്തോട് സാമ്പത്തിക സഹായം ആവശ്യപ്പെട്ടിട്ടുണ്ട്.
ദേശീയ ദുരന്തനിവാരണ നിധിയുടെ മാനദണ്ഡങ്ങൾ പ്രകാരം ഏകദേശം 10,000 കോടി മുതൽ 11,000 കോടി രൂപവരെ കേന്ദ്രസഹായം തേടിയതായാണ് റിപ്പോർട്ട്. ഇതിനിടെ, ദുരിതാശ്വാസ നടപടികൾക്കായി 1,250 കോടി രൂപയുടെ ആദ്യ ഗഡു അനുവദിച്ചതായി പരമേശ്വര ഇന്നലെ അറിയിച്ചു.
കൃഷിനാശം മൂലം വരുമാനം നഷ്ടപ്പെട്ട കർഷകർക്ക് നഷ്ടപരിഹാരം നൽകുന്നതിനൊപ്പം കുടിവെള്ളക്ഷാമം രൂക്ഷമായ പ്രദേശങ്ങളിൽ അടിയന്തര നടപടികൾ സ്വീകരിക്കേണ്ടതും സർക്കാരിന് മുന്നിലുള്ള പ്രധാന വെല്ലുവിളിയാണ്.
SUMMARY: 217 taluks in Karnataka drought-hit; loan being considered for relief.
