ബെംഗളൂരു: നഗരത്തിന്റെ അതിർത്തി പ്രദേശങ്ങളിൽ വന്യജീവികളുടെ സാന്നിധ്യം വീണ്ടും ചർച്ചയാകുന്നു. പടിഞ്ഞാറൻ ബെംഗളൂരുവിലെ നാഡപ്രഭു കെമ്പെഗൗഡ ലേഔട്ടിൽ പുള്ളിപുലിയെ കണ്ടതായി റിപ്പോർട്ട്. സുളിക്കെരെ വനമേഖലയോട് ചേർന്നുള്ള താമസബ്ലോക്കിന് സമീപമാണ് പുലിയെ കണ്ടത്.
Leopard seen roaming in Sulikere block of Nadaprabhu Kempegowda layout, west Bengaluru
@NPKLOpenForum https://t.co/8Rn9tq9YLH
— Naveen Menezes (@naveenmzs) October 30, 2026
രാത്രി സമയത്ത് ചരക്കുവാഹനം ഓടിച്ചുപോകുകയായിരുന്ന ഒരാൾ പുലി റോഡ് മുറിച്ചുകടക്കുന്ന ദൃശ്യം മൊബൈൽ ഫോണിൽ പകർത്തിയതായാണ് റിപ്പോർട്ട്. ഈ വീഡിയോ സമൂഹമാധ്യമങ്ങളിൽ പ്രചരിച്ചതോടെയാണ് സംഭവം പുറത്തറിഞ്ഞത്. കണ്ടത് പ്രായം കുറഞ്ഞ ചിരുതപ്പുലിയാണെന്നാണ് പ്രാഥമിക വിലയിരുത്തൽ.
പ്രദേശവാസിയായ മധുസൂദൻ വി. നേരത്തെയും ഇവിടെ പുലിയെ കണ്ടിട്ടുണ്ടെന്നും പുലിയുടെ കാൽപ്പാടുകളുടെ ചിത്രങ്ങൾ ലഭിച്ചിട്ടുണ്ടെന്നും അറിയിച്ചു. സുളിക്കെരെ വനമേഖല സമീപത്തായതിനാൽ ഈ പ്രദേശത്ത് വന്യജീവികളുടെ സാന്നിധ്യം അസാധാരണമല്ലെന്നും അദ്ദേഹം പറഞ്ഞു.
ബെംഗളൂരുവിന്റെ പുറംപ്രദേശങ്ങളിലെ നിരവധി ബി.ഡി.എ ലേഔട്ടുകൾ വനമേഖലകളോട് ചേർന്നാണ് സ്ഥിതിചെയ്യുന്നതെന്ന് നാഡപ്രഭു കെമ്പെഗൗഡ ലേഔട്ട് ഓപ്പൺ ഫോറം പ്രതിനിധി എ.എസ്. സൂര്യകിരൺ ചൂണ്ടിക്കാട്ടി. വന്യജീവികളുടെ സഞ്ചാരപാതകൾ ശാസ്ത്രീയമായി വിലയിരുത്തുകയും നിരീക്ഷണ സംവിധാനം ശക്തിപ്പെടുത്തുകയും പൊതുജനങ്ങൾക്ക് മുന്നറിയിപ്പ് നൽകുകയും വേണമെന്ന് അദ്ദേഹം ആവശ്യപ്പെട്ടു.
പുലിയെ കണ്ടതായി റിപ്പോർട്ട് വന്ന സാഹചര്യത്തിൽ രാത്രി സമയങ്ങളിൽ ഒറ്റയ്ക്ക് സഞ്ചരിക്കുന്നത് ഒഴിവാക്കാനും പ്രദേശവാസികൾ ജാഗ്രത പാലിക്കാനും നിർദേശമുണ്ട്. വന്യജീവികളെ കണ്ടാൽ അടുത്തുചെല്ലുകയോ പിന്തുടരുകയോ ചെയ്യരുത്. ഉടൻ വനംവകുപ്പിനെ വിവരമറിയിക്കണം.
നഗരവികസനം വനമേഖലകളിലേക്ക് വ്യാപിക്കുന്ന സാഹചര്യത്തിൽ മനുഷ്യരും വന്യജീവികളും തമ്മിലുള്ള സംഘർഷം ഒഴിവാക്കാൻ വനംവകുപ്പും നഗരവികസന അതോറിറ്റികളും ചേർന്നുള്ള നിരീക്ഷണ സംവിധാനം അനിവാര്യമാണെന്ന ആവശ്യവും ഉയരുന്നുണ്ട്.
SUMMARY: Leopard spotted in West Bengaluru; footage of it crossing the road at night goes viral.
