ഡാക്കർ: സെനഗലിന്റെ തലസ്ഥാനമായ ഡാക്കറിന് തെക്കുള്ള യെന്നെ (Yenne) തീരത്തിന് സമീപം കുടിയേറ്റക്കാർ സഞ്ചരിച്ച ബോട്ട് മുങ്ങി നാലുപേർ മരിക്കുകയും നിരവധി പേരെ കാണാതാവുകയും ചെയ്തു. ബുധനാഴ്ച പുലർച്ചെയാണ് ഈ ദാരുണമായ അപകടം സംഭവിച്ചത്. ഏകദേശം നൂറോളം കുടിയേറ്റക്കാരുമായി സഞ്ചരിച്ച ബോട്ടാണ് സെനഗൽ തീരത്ത് അപകടത്തിൽ പെട്ടത്. തീരത്തുനിന്ന് ചെറിയ മത്സ്യബന്ധന ബോട്ടുകളിൽ എത്തിയ കുടിയേറ്റക്കാരെ വലിയ ബോട്ടിലേക്ക് (Pirogue) മാറ്റുന്നതിനിടെ ബോട്ട് പാറയിലിടിച്ച് മറിയുകയായിരുന്നുവെന്ന് പ്രാദേശിക ഉദ്യോഗസ്ഥർ വ്യക്തമാക്കി.
തലസ്ഥാനമായ ഡക്കാറിന് തെക്ക് യെന്നെ ഗ്രാമത്തിന് സമീപമാണ് അപകടം. അപകടത്തിൽപ്പെട്ട് തകർന്ന ബോട്ട് തീരത്തടിയുകയായിരുന്നു. ബോട്ടിൽനിന്ന് വ്യക്തികളുടെ തിരിച്ചറിയൽ രേഖകളും മൊബൈൽ ഫോണുകളും കണ്ടെത്തി. കാണാതായവർക്കായി സെനഗൽ അധികൃതരും അഗ്നിശമന സേനയും തിരച്ചിൽ തുടരുകയാണ്.
രണ്ടാഴ്ചയ്ക്കുള്ളിൽ സെനഗൽ തീരത്തുണ്ടാകുന്ന രണ്ടാമത്തെ വലിയ കുടിയേറ്റ ദുരന്തമാണിത്. കഴിഞ്ഞ മാസം വടക്കുപടിഞ്ഞാറൻ നഗരമായ തിയേപ്പെയ്ക്ക് സമീപം ബോട്ട് മുങ്ങി 39 പേർ മരിച്ചിരുന്നു. പശ്ചിമ ആഫ്രിക്കയിൽനിന്ന് യൂറോപ്പിലേക്ക് കടക്കാനുള്ള ശ്രമത്തിനിടെ കഴിഞ്ഞ കുറച്ചു വർഷങ്ങളായി ആയിരക്കണക്കിന് ആളുകളാണ് മരിക്കുകയോ കാണാതാവുകയോ ചെയ്തിട്ടുള്ളത്. ഈ വർഷം മാത്രം പശ്ചിമ ആഫ്രിക്കൻ തീരത്ത് 454 പേർ മരിക്കുകയോ കാണാതാവുകയോ ചെയ്തതായി ഐക്യരാഷ്ട്രസഭ അറിയിച്ചു.
SUMMARY: Boat carrying migrants sinks off Senegal coast; Many people are missing
















