ബെംഗളൂരു: ബെംഗളൂരു മെട്രോ റെയിൽ പദ്ധതിയുടെ മൂന്നാം ഘട്ടത്തിന്റെ ഭാഗമായ റെഡ് ലൈനിനായുള്ള വിശദ പ്രൊജക്റ്റ് റിപ്പോർട്ട് (ഡിപിആർ) സർക്കാരിന് സമർപ്പിച്ച് ബിഎംആർസിഎൽ. മെട്രോ ഫേസ് 3എയുടെ ഭാഗമാണ് റെഡ് ലൈൻ. സംസ്ഥാന സർക്കാർ അംഗീകരിച്ചാൽ ഡിപിആർ കേന്ദ്ര സർക്കാരിൻ്റെ മുന്നിലേക്ക് എത്തും. ഇടനാഴിക്ക് അംഗീകാരം ലഭിച്ചാൽ ബെംഗളൂരുവിലെ ഏറ്റവും ചെലവേറിയ മെട്രോ ഇടനാഴികളിൽ ഒന്നായിരിക്കും ഇത്.
2022 – 2023 ബജറ്റിൽ ബിജെപി സർക്കാർ പ്രഖ്യാപിച്ച പാതയാണിത്. അന്നത്തെ മുഖ്യമന്ത്രി ബസവരാജ് ബൊമ്മൈ 15,000 കോടി രൂപ ചെലവിൽ അഗര, കോറമംഗല, ഡയറി സർക്കിൾ വഴി സർജാപുർ- ഹെബ്ബാൾ ബന്ധിപ്പിക്കുന്ന പുതിയ മെട്രോ ഇടനാഴി പ്രഖ്യാപിച്ചിരുന്നു.
4 ഇൻ്റർചേഞ്ച് സ്റ്റേഷനുകൾ ഉൾപ്പെടെ 28 സ്റ്റേഷനുകൾ പദ്ധതിയിൽ ഉണ്ടാകും. 37 കിലോമീറ്റർ ദൂരമാണ് പദ്ധതിയുടെ ഭാഗമായുണ്ടാകുക. ഭൂമി ഏറ്റെടുക്കൽ ചെലവ് ഉൾപ്പെടെ 28,405 കോടി രൂപയാണ് ചെലവ് പ്രതീക്ഷിക്കുന്നത്. പദ്ധതിയുമായി ബന്ധപ്പെട്ട പ്രവർത്തനം അതിവേഗത്തിൽ പുരോഗമിച്ചാൽ 2030 ഓടെ ആദ്യഘട്ടം പൂർത്തിയാകുമെന്നാണ് പ്രതീക്ഷിക്കുന്നതെന്ന് ബിഎംആർസിഎൽ ഉദ്യോഗസ്ഥർ പറഞ്ഞു.
TAGS: BENGALURU | NAMMA METRO
SUMMARY: DPR for third phase of namma metro submitted to state govt
