കൊച്ചി: കേരളത്തിലെ പ്രമുഖ ബാങ്കില്‍നിന്ന് സൈബര്‍ തട്ടിപ്പിലൂടെ 27 കോടി രൂപ തട്ടിയെടുത്ത പ്രതിയെ അസമിലെത്തി പിടികൂടി കേരള പോലീസ്. അസമിലെ മോറിഗാവ് ജില്ലയിലെ ലാഹോരിഘട്ട് സ്വദേശി സിറാജുല്‍ ഇസ്‌ലാമിനെയാണ് സംസ്ഥാന ക്രൈംബ്രാഞ്ചിന്റെ സാമ്പത്തിക കുറ്റാന്വേഷണ വിഭാഗം പിടികൂടിയത്. തട്ടിപ്പിലെ പങ്കാളിയും ഇയാളുടെ ഇളയ സഹോദരനുമായ ഷെറിഫുല്‍ ഇസ്‌ലാം ഒളിവിലാണ്.
കോഴി ഫാമും ഭൂമിയടക്കമുള്ള സ്വത്തുവകകളും വലിയ വീടുമൊക്കെയായി ആഡംബര ജീവിതമായിരുന്നു ഇവരുടേത്. കേരളത്തിലെത്തിച്ച പ്രതിയെ എറണാകുളം സിജെഎം കോടതിയില്‍ ഹാജരാക്കി റിമാന്‍ഡ് ചെയ്തു.
വിദഗ്ധമായാണ് സിറാജുല്‍ ഇസ്‌ലാം തട്ടിപ്പ് ആസൂത്രണം ചെയ്തു നടപ്പാക്കിയത്. ആവശ്യക്കാര്‍ക്ക് ആധാറും പാന്‍കാര്‍ഡും എടുത്തുകൊടുക്കുന്ന ഏജന്‍സി നടത്തുകയായിരുന്നു ഇയാള്‍. അങ്ങനെ ലഭിക്കുന്ന പാന്‍ കാര്‍ഡുകളില്‍ മെച്ചപ്പെട്ട സിബില്‍ സ്‌കോര്‍ ഉള്ളവ കണ്ടെത്തി അതില്‍ സ്വന്തം ചിത്രം ചേര്‍ത്ത് ഡിജിറ്റല്‍ കെവൈസി പൂര്‍ത്തിയാക്കും.
അതിനായി ആധാറിലും സ്വന്തം ചിത്രം പതിക്കും. തുടര്‍ന്ന് ഈ രേഖകള്‍ ഉപയോഗിച്ച്, ബാങ്കിന്റെ ഓണ്‍ലൈന്‍ ക്രെഡിറ്റ് കാര്‍ഡ് നല്‍കുന്ന പ്ലാറ്റ്‌ഫോമില്‍ രജിസ്റ്റര് ചെയ്ത് വെര്‍ച്വല്‍ ക്രെഡിറ്റ് കാര്‍ഡ് സ്വന്തമാക്കും. കാര്‍ഡ് ലഭിച്ചാലുടന്‍ അതിലെ പണം പ്രമുഖ ഡിജിറ്റല്‍ വാലറ്റ് ആപ്പിലേക്കും അവിടെനിന്ന് സ്വന്തം അക്കൗണ്ടിലേക്കും മാറ്റും. ഇത്തരത്തില്‍ 500 ലേറെ പേരുടെ പാന്‍കാര്‍ഡുകളാണ് പ്രതി തട്ടിപ്പിന് ഉപയോഗിച്ചത്.
SUMMARY: 27 crores earned through cyber fraud; Luxurious house and farms, Kerala police arrest the accused in Assam
