ബെംഗളൂരു: ശിവമൊഗ്ഗ വിമാനത്താവളത്തിനു സമീപത്തു നിന്നു കരടിയെ വനംവകുപ്പ് സംഘം പിടികൂടി. ഏഴുവയസ്സുള്ള കരടിയെ ആണ് പിടികൂടിയത്. വിമാനത്താവളമുള്ള സോഗനയിലെ പലയിടങ്ങളില്‍ കരടി അലഞ്ഞു നടക്കുന്നതിന്റെ വിഡിയോകളും ചിത്രങ്ങളും പ്രചരിച്ചിരുന്നു. കരടിയുടെ സാന്നിധ്യം സ്ഥിരീകരിച്ചതോടെ പരിസരവാസികള്‍ ആശങ്കയിലായിരുന്നു.
തുംഗനഗര്‍ പോലീസ് സ്റ്റേഷനില്‍ നിന്ന് വിവരം ലഭിച്ചതിനെത്തുടര്‍ന്ന്, വനംവകുപ്പിന്റെ ഉംബ്ലെബൈലു റേഞ്ചിലെ 20 അംഗ സംഘം മൃഗഡോക്ടറുമായി സ്ഥലത്തെത്തി കരടിയെ പിടികൂടാനുള്ള പ്രവര്‍ത്തനങ്ങള്‍ ആരംഭിച്ചു. സോഗാനെ ഗ്രാമപ്പഞ്ചായത്ത് പരിധിയിലുള്ള വിനായകനഗറില്‍ രാവിലെ കണ്ട കരടി പിന്നീട് വിമാനത്താവള കോമ്പൗണ്ടിനുള്ളില്‍ ചാടുകയായിരുന്നു. അവിടെ അലഞ്ഞുതിരിഞ്ഞ ശേഷം വീണ്ടും അയല്‍പക്കത്തുള്ള ജ്യോതിനഗറിലേക്ക് എത്തി. അവിടെ നിന്ന് ദൊഡ്ഡബീലു ഗ്രാമത്തിലേക്ക് പോയി വീണ്ടും വിമാനത്താവള പരിസരത്തേക്ക് തിരിച്ചെത്തുകയായിരുന്നു.ഇവിടെ വെച്ചാണ് കരടിയെ വനം വകുപ്പ് സംഘം മയക്കുവെടിവച്ചു പിടികൂടിയത്. പിടികൂടിയ ശേഷം ശിവമോഗയുടെ പ്രാന്തപ്രദേശത്തുള്ള ത്യവരെകൊപ്പയ്ക്ക് സമീപമുള്ള പുനരധിവാസ കേന്ദ്രത്തില്‍ കരടിയെ തുറന്നുവിട്ടു.
SUMMARY: Bear found near airport shot and captured
