ബെംഗളൂരു: ഇന്നലെ രാവിലെ ബെംഗളൂരുവിലെ നമ്മ മെട്രോ ഗ്രീൻ ലൈനിൽ സാങ്കേതിക തകരാർ ഉണ്ടായതിനെ തുടർന്ന് യാത്രക്കാർക്ക് വലിയ ബുദ്ധിമുട്ട് നേരിട്ടു. തകരാറിനെ തുടർന്ന് ട്രെയിൻ സർവീസുകൾ താൽക്കാലികമായി തടസ്സപ്പെടുകയും നിരവധി സർവീസുകൾ വൈകുകയും ചെയ്തു.
രാവിലെ ഏകദേശം 8.23 മുതൽ 8.45 വരെ സർവീസ് തടസ്സപ്പെട്ടതായി ബെംഗളൂരു മെട്രോ റെയിൽ കോർപ്പറേഷൻ ലിമിറ്റഡ് അറിയിച്ചു. തുടർന്ന് സർവീസ് പുനരാരംഭിച്ചെങ്കിലും ട്രെയിനുകൾ സാധാരണ സമയക്രമത്തിലേക്ക് മടങ്ങാൻ കുറച്ച് സമയം എടുത്തു. അതിനിടെ സ്റ്റേഷനുകളിൽ യാത്രക്കാരുടെ തിരക്ക് വർധിക്കുകയും ഓഫീസുകളിലേക്കും വിദ്യാഭ്യാസ സ്ഥാപനങ്ങളിലേക്കും പോകുന്നവർക്ക് കാലതാമസം നേരിടുകയും ചെയ്തു.
സാങ്കേതിക തകരാർ കണ്ടെത്തിയ ഉടൻ എൻജിനീയറിങ് സംഘം പ്രശ്നം പരിഹരിച്ചതായും നിലവിൽ ഗ്രീൻ ലൈനിലെ സർവീസുകൾ സാധാരണ നിലയിലായതായും ബി.എം. ആർ.സി. എൽ അറിയിച്ചു. യാത്രക്കാർക്ക് ഉണ്ടായ അസൗകര്യത്തിൽ അധികൃതർ ഖേദം പ്രകടിപ്പിക്കുകയും ഭാവിയിൽ ഇത്തരം തടസ്സങ്ങൾ ഒഴിവാക്കാൻ ആവശ്യമായ നടപടികൾ സ്വീകരിക്കുമെന്നും അറിയിച്ചു.
SUMMARY: Bengaluru Metro Green Line suffers technical glitch; service disrupted during rush hour
