ചൊവ്വയില്‍ എട്ട് അസാധാരണ ഗുഹകള്‍ കണ്ടെത്തി ചൈനീസ് ശാസ്ത്രജ്ഞര്‍

ചൈന: ചൊവ്വയെക്കുറിച്ചുള്ള നമ്മുടെ പരമ്പരാഗത സങ്കല്‍പ്പങ്ങളെ തിരുത്തിക്കുറിക്കുന്ന പുതിയ കണ്ടെത്തലുമായി ചൈനീസ് ശാസ്ത്രജ്ഞർ രംഗത്തെത്തിയിരിക്കുന്നു. ചൊവ്വയിലെ ഹീബ്രസ് വാലെസ് (Hebrus Valles) മേഖലയില്‍ വെള്ളത്തിന്റെ സാന്നിധ്യത്താല്‍ രൂപപ്പെട്ടതെന്ന് കരുതുന്ന എട്ട് അസാധാരണ ഗുഹകളാണ് ഗവേഷകർ തിരിച്ചറിഞ്ഞത്.

അഗ്നിപർവ്വത സ്ഫോടനങ്ങള്‍ മൂലമോ ഉല്‍ക്കാപതനങ്ങള്‍ മൂലമോ ഉണ്ടായവയല്ല ഇവ എന്നതാണ് ഈ കണ്ടെത്തലിനെ സവിശേഷമാക്കുന്നത്. ഭൂമിയില്‍ കാണപ്പെടുന്ന കാർസ്റ്റ് (Karst) ഗുഹകള്‍ക്ക് സമാനമായാണ് ഇവ രൂപപ്പെട്ടിരിക്കുന്നത്. വെള്ളത്തില്‍ അലിയുന്ന പാറകള്‍ രാസപ്രവർത്തനത്തിലൂടെ ലയിച്ചുണ്ടായതാണ് ഇവയെന്ന് കരുതപ്പെടുന്നു. ചൊവ്വയുടെ വടക്കുപടിഞ്ഞാറൻ മേഖലയിലുള്ള ഹീബ്രസ് വാലെസിലെ എട്ട് വൃത്താകൃതിയിലുള്ള കുഴികളാണിത്.

സാധാരണ ഗർത്തങ്ങളില്‍ കാണുന്ന ഉയർന്ന വരമ്പുകളോ അവശിഷ്ടങ്ങളോ ഇവയ്ക്കില്ല. നാസയുടെ മാർസ് ഗ്ലോബല്‍ സർവേയർ നല്‍കിയ വിവരങ്ങള്‍ പ്രകാരം ഇവിടെ കാർബണേറ്റുകളും സള്‍ഫേറ്റുകളും കണ്ടെത്തിയിട്ടുണ്ട്. ഇവ വെള്ളത്തിന്റെ സാന്നിധ്യത്തില്‍ മാത്രം രൂപപ്പെടുന്ന ധാതുക്കളാണ്. ചൊവ്വയുടെ ഉപരിതലത്തിലെ കഠിനമായ വികിരണങ്ങളില്‍ നിന്നും പൊടിക്കാറ്റുകളില്‍ നിന്നും സംരക്ഷണം നല്‍കാൻ ഈ ഗുഹകള്‍ക്ക് സാധിക്കും.

അതിനാല്‍ തന്നെ, മുൻകാലങ്ങളില്‍ ചൊവ്വയില്‍ ജീവൻ നിലനിന്നിരുന്നെങ്കില്‍ അതിന്റെ തെളിവുകള്‍ ഇത്തരം ഭൂഗർഭ അറകളില്‍ ഉണ്ടാകാൻ സാധ്യതയുണ്ടെന്ന് ശാസ്ത്രജ്ഞർ വിശ്വസിക്കുന്നു. നാസയുടെ വിവിധ ഉപഗ്രഹ ദൗത്യങ്ങളില്‍ നിന്നുള്ള വിവരങ്ങളാണ് ശാസ്ത്രജ്ഞർ പ്രയോജനപ്പെടുത്തിയത്. മാർസ് ഗ്ലോബല്‍ സർവേയറിലെ തെർമല്‍ എമിഷൻ സ്പെക്‌ട്രോമീറ്റർ നല്‍കിയ വിവരങ്ങള്‍ ചൊവ്വയിലെ ധാതുഘടനയെക്കുറിച്ച്‌ നിർണ്ണായക സൂചനകള്‍ നല്‍കി.

സാധാരണയായി ജലത്തിന്റെ സാന്നിധ്യത്തില്‍ മാത്രം രൂപം കൊള്ളാറുള്ള കാർബണേറ്റുകള്‍, സള്‍ഫേറ്റുകള്‍ തുടങ്ങിയ ധാതുക്കള്‍ ഈ മേഖലയില്‍ കണ്ടെത്തിയിട്ടുണ്ട്. ചൊവ്വയുടെ ഉപരിതലത്തിനടിയില്‍ ദീർഘകാലം ജലം ഒഴുകിയിരുന്നു എന്നതിന്റെ വ്യക്തമായ തെളിവായി ഇതിനെ കണക്കാക്കാം.

ചൊവ്വയില്‍ ജീവന്റെ സാന്നിധ്യം തിരയുന്ന ഗവേഷകർക്ക് ഈ കണ്ടെത്തല്‍ ഒരു പുതിയ ദിശാബോധം നല്‍കുന്നു. ഗ്രഹത്തിന്റെ ഉപരിതലത്തില്‍ നിലനില്‍ക്കുന്ന കൊടും തണുപ്പ്, മാരകമായ വികിരണങ്ങള്‍, പൊടിക്കാറ്റുകള്‍ എന്നിവയില്‍ നിന്ന് സംരക്ഷണം നല്‍കാൻ ഈ ഗുഹകള്‍ക്ക് സാധിക്കും. അതിനാല്‍ തന്നെ, ഭാവിയിലെ ചൊവ്വാ ദൗത്യങ്ങള്‍ ഉപരിതലത്തിന് പകരം ഇത്തരം ആഴമേറിയ ഗുഹകളെ കേന്ദ്രീകരിച്ചായിരിക്കും പര്യവേക്ഷണം നടത്തുക. ജീവന്റെ അവശേഷിപ്പുകളോ സുപ്രധാന തെളിവുകളോ ഈ ഭൂഗർഭ അറകളില്‍ ഒളിഞ്ഞിരിപ്പുണ്ടാകാം എന്നാണ് ഗവേഷകരുടെ പ്രതീക്ഷ.

SUMMARY: Chinese scientists discover eight unusual caves on Mars