കൊച്ചി: അഞ്ച് വര്ഷം മുമ്പ് കാലടി സംസ്കൃത സര്വകലാശാല പ്രഖ്യാപിച്ച ഡി ലിറ്റ് ബിരുദം നടി ശോഭന അടക്കം മൂന്ന് പേര്ക്കും ഇതുവരെ ലഭിച്ചില്ല. ശോഭന, സംസ്കൃത പണ്ഡിതന് എന് പി ഉണ്ണി, ശാസ്ത്രീയ സംഗീതജ്ഞന് ടി എം കൃഷണ എന്നിവർക്ക് ഡി ലിറ്റ് നല്കി ആദരിക്കുമെന്ന് തീരുമാനിച്ചിരുന്നു.
സംസ്കൃത സാഹിത്യത്തിലും ഗവേഷണത്തിലുമുള്ള സമഗ്ര സംഭാവനകള് കണക്കിലെടുത്ത് ഡോ. എന്പി ഉണ്ണി, ശാസ്ത്രീയ സംഗീതത്തിലെ സമഗ്ര സംഭാവനകള് പരിഗണിച്ച് ടിഎം കൃഷ്ണ, ഭരതനാട്യത്തിലും ചലച്ചിത്ര രംഗത്തും നല്കിയ സംഭാവനകള് കണക്കിലെടുത്ത് ശോഭന എന്നിവർക്ക് ഡി ലിറ്റ് ബിരുദം നല്കുമെന്ന് 2021 ല് കാലടി സംസ്കൃത സർവകലാശാല പ്രഖ്യാപനം നടത്തിയിരുന്നു. ഇതാണ് അഞ്ചു വർഷമായിട്ടും നല്കാത്തത്.
അന്ന് ഗവര്ണറുടെ സമയം ലഭിക്കാത്തതിനെ തുടര്ന്നാണ് ചടങ്ങ് മാറ്റിവച്ചതെന്നും പിന്നീടത് മറന്നുപോയതാകാമെന്നും മുന് വി.സി ഡോ. ധര്മരാജ് അടാട്ട് വ്യക്തമാക്കുന്നു. നിലവില് കടുത്ത സാമ്പത്തിക പ്രതിസന്ധിയില് ആണ് സർവകലാശാലയെന്നും ഡി ലിറ്റിനെക്കുറിച്ച് ചിന്തിച്ചിട്ടുപോലും ഇല്ലെന്നും ഇപ്പോഴത്തെ വിസിയായ ഡോ. ഗീതാ കുമാരി പറയുന്നു.
കാലടി ശ്രീശങ്കരാചാര്യ സംസ്കൃത സര്വകലാശാല മുന് വൈസ് ചാന്സലറാണ് ഡോ. എന്പി ഉണ്ണി. കര്ണാടക സംഗീതത്തിലെ വായ്പാട്ടുകാരിലൊരാളാണ് ടിഎം. കൃഷ്ണ. ശാസ്ത്രീയ സംഗീതത്തെ ജനകീയമാക്കുന്നതില് ടിഎം കൃഷ്ണ പ്രധാന പങ്കു വഹിച്ചിട്ടുണ്ട്. അഭിനയത്തിനുള്ള ദേശീയ സംസ്ഥാന പുരസ്കാരങ്ങള് നേടിയ അനുഗ്രഹീത കലാകാരിയും നർത്തകിയുമാണ് ശോഭന.
SUMMARY: Kalady University did not award the D. Litt degree announced in 2021 to 3 people including Shobhana.
WhatsApp
Telegram
