ബെംഗളൂരു: ബെംഗളൂരുവിലെ ഏറ്റവും ജനത്തിരക്കേറിയ മജസ്റ്റിക്കിലെ കെഎസ്ആർ ബെംഗളൂരു റെയിൽവേ ടെർമിനൽ വിപുലീകരിക്കുന്നു. പുതിയ 2 പ്ലാറ്റ്ഫോമുകൾ, നാലാം പ്രവേശനകവാടം, പാർക്കിങ് ബേ, ഫുഡ് പ്ലാസ ഉൾപ്പെടെയുള്ള ആധുനിക സൗകര്യങ്ങളടക്കം നവീകരണത്തിന്റെ ഭാഗമായി ഏര്പ്പെടുത്തും.
നിലവിലെ 10 പ്ലാറ്റ്ഫോമുകൾക്കു പുറമേ 2 പ്ലാറ്റ്ഫോമുകൾ കൂടി നിർമിക്കും. ഇതോടെ, ട്രെയിനുകൾ കന്റോൺമെന്റിനും മജസ്റ്റിക്കിനും ഇടയിൽ പിടിച്ചിടുന്നതു കഴിയുന്നത്ര ഒഴിവാക്കാനാകും. 2 നിലകളിൽ മൾട്ടി ലവൽ പാർക്കിങ് കേന്ദ്രവും നിര്മിക്കും. കെഎസ്ആർ മെട്രോ സ്റ്റേഷനെ ബന്ധിപ്പിച്ച് കൂടുതൽ മേൽപാലങ്ങൾ, വിശ്രമകേന്ദ്രങ്ങൾ എന്നിവയും നിർമിക്കുന്നുണ്ട്. പുതിയ കാൽനട അടിപ്പാതകളും മേല്പ്പാലങ്ങളും നിര്മിക്കും. മെട്രോയുടെ മജസ്റ്റിക് ഇന്റർചേഞ്ച്, ക്രാന്തീ വീര സംഗൊള്ളി രായണ്ണ സ്റ്റേഷനുകളിൽ നിന്നും നിലവിലുള്ള മേൽപാലത്തിനും അടിപ്പാതയ്ക്കും പുറമേ 2 എണ്ണം കൂടി നിർമിക്കും.
റെയിൽ ലാൻഡ് ഡവലപ്മെന്റ് അതോറിറ്റിയാണ് 1500 കോടി രൂപയുടെ നവീകരണ പദ്ധതി നടപ്പാക്കുന്നത്. സ്റ്റേഷൻ നവീകരിക്കുന്നതിനുള്ള വിശദമായ മാസ്റ്റർ പ്ലാൻ ദക്ഷിണ പശ്ചിമ റെയിൽവേ (എസ്ഡബ്ല്യുആർ) നേരത്തെ അംഗീകരിച്ചിരുന്നു. കർണാടകയിലെ ഏറ്റവും വലിയ റെയിൽവേ സ്റ്റേഷനായ കെഎസ്ആർ ബെംഗളൂരുവിൽ നിലവില് 107 ഏക്കർ വിസ്തൃതിയുള്ള മൊത്തം സ്റ്റേഷനും യാർഡും, 10 പ്ലാറ്റ്ഫോമുകളും, ആറ് സ്റ്റേബിളിംഗ് ലൈനുകളും, അഞ്ച് പിറ്റ് ലൈനുകളും ഉണ്ട്. കർണാടകയിലെ ഏക ഗ്രേഡ് 1 റെയിൽവേ സ്റ്റേഷന് കൂടിയാണ് കെഎസ്ആർ ബെംഗളൂരു.
SUMMARY: Majestic KSR Bengaluru station is being expanded
