കൊച്ചി: സംസ്ഥാന വ്യാപകമായി കേരള പോലീസ് നടത്തിയ ഓപ്പറേഷൻ സൈ ഹണ്ടിൽ രജിസ്‌റ്റർ ചെയ്തത് 382 കേസുകൾ. 263 പേർ അറസ്‌റ്റിലായപ്പോൾ 125 പേരെ നോട്ടീസ്‌ നൽകി നിരീക്ഷണത്തിൽ വിട്ടയച്ചു. മുന്നൂറ്‌ കോടിയിലധികം രൂപയുടെ സൈബർ തട്ടിപ്പുകൾ കേന്ദ്രീകരിച്ച്‌ മൂന്ന്‌ മാസംകൊണ്ട്‌ നടത്തിയ അന്വേഷണത്തിനൊടുവിലാണ് നടപടിയെന്ന് സൈബർ ഓപ്പറേഷൻസ്‌ എഡിജിപി എസ്‌ ശ്രീജിത് പറഞ്ഞു.
വ്യാഴാഴ്ച പുലർച്ചെ ആറുമുതൽ കേരളത്തിലെ എല്ലാ പോലീസ് സ്റ്റേഷൻ പരിധിയിലും വ്യാപകമായ റെയ്‌ഡാണ് നടന്നത്. കേരള പോലീസ് സൈബർ ഓപ്പറേഷൻസിന്റെ റെയ്‌ഞ്ച് ഡിഐജിമാരുടെയും ജില്ലാ പോലീസ് മേധാവിയുടെയും മേൽനോട്ടത്തിലായിരുന്നു ഇത്. രാജ്യവ്യാപകമായി സൈബർ സംഘടിത സാമ്പത്തിക കുറ്റകൃത്യങ്ങളിൽ പങ്കാളികളായി തട്ടിപ്പ് നടത്തിയെടുത്ത പണം, ചെക്കുകൾ ഉപയോഗിച്ചും എടിഎം വഴിയും പിൻവലിച്ച് അനധികൃതമായി സാമ്പത്തിക നേട്ടം ഉണ്ടാക്കിയവരെയും അക്കൗണ്ടുകൾ വാടകയ്ക്ക് നൽകി കമ്മിഷൻ കൈപ്പറ്റിയവരെയുമാണ് അറസ്റ്റ് ചെയ്തത്.
സംശയാസ്പദമായി ചെക്കുകൾ ഉപയോഗിച്ച് പണം പിൻവലിച്ച 2683 പേരുടെയും എടിഎം വഴി പിൻവലിച്ച 361 പേരുടെയും അക്കൗണ്ടുകൾ വാടകയ്ക്ക് നൽകിയ 665 പേരുടെയും വിവരങ്ങൾ നാഷണൽ സൈബർ ക്രൈം റിപ്പോർട്ടിങ് പോർട്ടലിൽനിന്നു ലഭിച്ചതാണ് അന്വേഷണത്തിലേക്ക് വഴിതെളിച്ചത്. വിശദമായ തെളിവുകൾ ശേഖരിച്ച ശേഷമാണ് പ്രതികളെ പോലീസ് കുരുക്കിയത്.
ഓപ്പറേഷൻ സൈ-ഹണ്ടിൽ ഏറ്റവും കൂടുതൽ കേസുകൾ രജിസ്‌റ്റർ ചെയ്തത് കോഴിക്കോടാണ്‌. 67 എണ്ണം. കൂടുതൽ അറസ്റ്റ് നടന്നത് എറണാകുളത്താണ്‌. 46 പേരെ ജില്ലയിൽ അറസ്റ്റ് ചെയ്തു.
SUMMARY: Operation ‘Cy-Hunt’ to nab cyber financial criminals; 263 arrested, 125 under surveillance.
WhatsApp
Telegram
