ബെംഗളൂരു: കർണാടക മന്ത്രിസഭാ വികസനത്തിന് പിന്നാലെ കോൺഗ്രസ് പാർട്ടിക്കുള്ളിൽ ഉയർന്ന അസംതൃപ്തി ശമിപ്പിക്കാൻ എ.ഐ.സി.സി. ജനറൽ സെക്രട്ടറി രണ്ദീപ് സിംഗ് സുര്ജേവാല ബെംഗളൂരുവിലെത്തി. മന്ത്രിസ്ഥാനം ലഭിക്കാതെ അതൃപ്തി പ്രകടിപ്പിച്ച എം.എൽ.എമാരുമായും മുതിർന്ന നേതാക്കളുമായും അദ്ദേഹം പ്രത്യേകം കൂടിക്കാഴ്ച നടത്തി സ്ഥിതിഗതികൾ വിലയിരുത്തുകയാണ്.
19 പുതിയ മന്ത്രിമാരെ ഉൾപ്പെടുത്തിയ മന്ത്രിസഭാ വികസനത്തിന് പിന്നാലെ നിരവധി കോൺഗ്രസ് എം.എൽ.എമാർ പരസ്യമായി അതൃപ്തി പ്രകടിപ്പിച്ചിരുന്നു. ചിലർ രാജി ഭീഷണി മുഴക്കുകയും, വിവിധ ജില്ലകളിൽ അനുയായികൾ പ്രതിഷേധവുമായി രംഗത്തെത്തുകയും ചെയ്ത സാഹചര്യത്തിലാണ് ഹൈക്കമാൻഡ് നേരിട്ട് ഇടപെട്ടത്.
സുര്ജേവാല മുഖ്യമന്ത്രി ഡി.കെ. ശിവകുമാർ, ഉപമുഖ്യമന്ത്രി ഉൾപ്പെടെയുള്ള സംസ്ഥാന നേതൃത്വവുമായി കൂടിക്കാഴ്ച നടത്തി. മന്ത്രിസ്ഥാനം ലഭിക്കാതെ നിരാശരായ നേതാക്കളെ അനുനയിപ്പിക്കുക, പാർട്ടിയിലെ ഭിന്നത പരിഹരിക്കുക, കൂടാതെ ഇനിയും നികത്താനുള്ള ഒരു ഒഴിവുള്ള മന്ത്രിസ്ഥാനം സംബന്ധിച്ച് അഭിപ്രായം തേടുക എന്നിവയാണ് സന്ദർശനത്തിന്റെ പ്രധാന ലക്ഷ്യങ്ങൾ.
അതേസമയം, അസംതൃപ്തരായ എം.എൽ.എമാർക്ക് മുഖ്യമന്ത്രി ഡി.കെ. ശിവകുമാർ നേരത്തെ കർശന മുന്നറിയിപ്പ് നൽകിയിരുന്നു. “രാജിവെക്കണമെങ്കിൽ വെക്കൂ, മിനിറ്റുകൾക്കകം രാജി അംഗീകരിക്കും” എന്നായിരുന്നു അദ്ദേഹത്തിന്റെ പ്രതികരണം. പാർട്ടി അച്ചടക്കത്തിൽ വിട്ടുവീഴ്ചയില്ലെന്നും നേതൃത്വം വ്യക്തമാക്കിയിട്ടുണ്ട്.
സുര്ജേവാലയുടെ ഇടപെടലിലൂടെ പാർട്ടിയിലെ പ്രതിഷേധം ശമിപ്പിക്കാനാകുമെന്ന പ്രതീക്ഷയിലാണ് കോൺഗ്രസ് നേതൃത്വം. എന്നാൽ മന്ത്രിസ്ഥാനത്തിനായി കാത്തിരിക്കുന്ന നേതാക്കളുടെ എണ്ണം കൂടുതലായതിനാൽ അസംതൃപ്തി പൂർണമായും അവസാനിക്കുമോയെന്നത് കണ്ടറിയേണ്ടതുണ്ടെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.
SUMMARY: Randeep Singh Surjewala in Bengaluru to address discontent in Congress, holds crucial discussions with MLAs
