ബെംഗളൂരു: വിദ്യാർഥികളെ ലൈംഗികമായി പീഡിപ്പിച്ചുവെന്ന കേസിൽ പ്രതിയായ അധ്യാപകൻ എസ്.പി. ഓഫീസ് കെട്ടിടത്തിൽനിന്ന് ചാടി ജീവനൊടുക്കി. വിജയനഗര സ്വദേശിയായ ശശിധർ (49) ആണ് മരിച്ചത്. ബെംഗളൂരു സൗത്ത് എസ്. പി. ഓഫീസിൻ്റെ മൂന്നാം നിലയിൽനിന്ന് ചാടിയാണ് മരിച്ചത്. അറസ്റ്റിനെത്തുടർന്നുള്ള നടപടികൾക്കായി എസ്. പി. ഓഫീസിൽ എത്തിച്ചപ്പോഴാണ് പോലീസിനെ വെട്ടിച്ച് കെട്ടിടത്തിൽനിന്ന് ചാടിയത്.
ചന്നപട്ടണത്തിലെ എയ്‌ഡഡ് സ്കൂളിലെ കായികവിഭാഗം അധ്യാപകനായിരുന്നു ശശിധർ. കുട്ടികളുടെ പീഡന പരാതിയിൽ രാമനഗര വനിതാ പോലീസ് സ്റ്റേഷൻ പോക്സോ കേസ് രജിസ്റ്റർ ചെയ്ത് ഇയാളെ അറസ്റ്റ് ചെയ്തു. ശേഷം മെഡിക്കൽ പരിശോധനപൂർത്തിയാക്കി വിരലടയാളമെടുക്കുന്നതിനുള്ള നടപടികൾക്കായി എസ്. പി. ഓഫീസിലേക്ക് കൊണ്ടു വന്നപ്പോഴാണ് സംഭവം. ഓഫീസിന്റെ മൂന്നാം നിലയിൽ നിന്ന് വിരലടയാളം രേഖപ്പെടുത്തി. പോലീസ് വാഹനത്തിലേക്ക് തിരികെ കൊണ്ടുപോകുന്നതിനിടെ, ശശിധർ കൂടെയുണ്ടായിരുന്ന കോൺസ്റ്റബിളിനെ തള്ളിമാറ്റി മൂന്നാം നിലയിൽ നിന്ന് ചാടുകയായിരുന്നു. ഉടൻ തന്നെ ആശുപത്രിയിൽ എത്തിച്ചുവെങ്കിലും ഗുരതരപരുക്കേറ്റ ശശിധർ മരണപ്പെടുകയായിരുന്നു.
